Oxçuçayın kimyəvi maddələrlə çirkləndirilməsi ilboyu davam edir

Ekologiya və Təbii Sərvətlər Nazirliyi tərəfindən Zəngilan rayonu ərazisində Oxçuçayın Şayıflı məntəqəsində suyun kəmiyyət və keyfiyyət göstəricilərinə onlayn nəzarət məqsədilə quraşdırılmış müasir avtomatik hidroloji stansiyadan fasiləsiz olaraq suyun oksigen rejimi, hidrogen göstəricisi, elektrik keçiriciliyi və suyun duz tərkibi haqqında məlumatlar əldə edilir. Noyabrın 30-da stansiyadan suyun keyfiyyətinə dair daxil olan məlumatların təhlili nəticəsində suyun oksigen rejimi, elektrik keçiriciliyi, o cümlədən hidrogen göstəricisində ciddi dəyişiklik olduğu, suyun keyfiyyətinin kəskin pisləşdiyi müəyyən edilib.

 YeniAvropa xəbər verir ki, bu barədə Milli Hidrometeorologiya Xidmətinin rəisi Umayra Tağıyeva məlumat verib.

U.Tağıyevanın sözlərinə görə, vəziyyəti yerində daha ətraflı müəyyən etmək məqsədilə Oxçuçayda operativ rejimdə nümunəgötürmə təşkil edilib, monitorinq zamanı suyun rənginin dəyişməsi və kəskin qoxu müşahidə olunub: “Noyabrın 30-da dekabrın 1 və 2-də keçirilmiş monitorinqlər zamanı doqquz ədəd su nümunəsi götürülüb, üzərində 153 adda müvafiq fiziki- kimyəvi analizlər aparılıb. Analiz nəticələrinə əsasən manqanın miqdarının normadan 6.1 dəfəyədək, dəmirin və ammoniumun ionunun miqdarının 5, suyun codluğunun 2.4, molibdenin və sulfatın ionunun miqdarının 1.3 dəfə yüksək olduğu müəyyən edilib. Ermənistanda yerləşən Qafan mis-molibden və Qacaran filiz saflaşdırma kombinatlarında istehsalat tullantı sularının birbaşa Oxçuçaya axıdılması çayın ağır metallarla və digər kimyəvi maddələrlə yüksək səviyyədə çirklənməsinə səbəb olur. Bu hal demək olar ki, bütün ilboyu davam edir, vaxtaşırı olaraq çayda suyun rəngində dəyişiklik olduğu və kəskin qoxu müşahidə edilir. Həmçinin balıqların, çayın bioloji müxtəlifliyin məhv olması da qeydə alınır”.