DİN vakant YPX inspektoru vəzifələrində müsabiqə elan edir

Azərbaycan Respublikasının Daxili İşlər Nazirliyi (DİN) aşağıda göstərilən polis orqanlarında vakant yol-patrul xidməti inspektoru (sıravi və kiçik rəis heyəti) vəzifələrində xidmətə qəbulla əlaqədar müsabiqə elan edir. DİN-in mətbuat xidmətindən YeniAvropa-ya bildiriblər ki, müsabiqəyə ümumilikdə 37, o cümlədən Baş Dövlət Yol Polisi İdarəsində 1, Bakı Şəhəri Dövlət Yol Polisi İdarəsində 27 və Nərimanov Rayon Polis İdarəsində 1, Hacıqabul, Kürdəmir, Samux, Yevlax, Cəlilabad, Laçın, Xızı, Şəki şəhər və rayon polis şöbələrinin hər birində 1 vakant vəzifə çıxarılıb. Həmin vakant vəzifələrin komplektləşdirilməsi məqsədilə keçiriləcək müsabiqədə avtomobil nəqliyyatına aid orta ixtisas və ya ali təhsilli, habelə tam orta təhsilli, kompüterlə işləmək bacarığı, sürücülük vəsiqəsi olan, 3 il sürücülük təcrübəsinə malik, yaşı 21-dən aşağı, 26-dan yuxarı olmayan, boyu 180 santimetr və daha yüksək, idman cüssəli, həqiqi hərbi xidmət müddətini tam başa vurmuş, özü və yaxın qohumları məhkum edilməyən, Bakı şəhəri və yuxarıda göstərilən rayonlarda qeydiyyatda olan və “Azərbaycan Respublikası daxili işlər orqanlarında xidmət keçmə haqqında Əsasnamə”də müəyyən olunan digər şərtlərə cavab verən Azərbaycan Respublikasının kişi vətəndaşları iştirak edə bilərlər.

Müsabiqə iştirakçılarının sağlamlıq vəziyyəti, biliyi, fiziki hazırlıq səviyyəsi, yol hərəkəti qaydaları üzrə nəzəri bilikləri və sürücülük vərdişləri müəyyən olunmuş qaydada yoxlanılacaq, xarici dillərdən birini sərbəst bilən və dövlət ali təhsil müəssisələrini bitirmiş namizədlərə üstünlük veriləcək.

Müsabiqədə iştirak etmək istəyən şəxslər 2018-ci il yanvarın 8-dən fevralın 5-dək hər gün (istirahət günləri istisna olmaqla) saat 10:00-dan 17:00-dək Daxili İşlər Nazirliyinin Baş Dövlət Yol Polisi İdarəsinə (Bakı şəhəri, Xırdalan-Binəqədi şosesi 4) müraciət edərək şəxsiyyət vəsiqəsini, təhsil haqqında sənədin əslini, hərbi bileti, əmək kitabçasını (olanlar üçün), sürücülük vəsiqəsini, kompüterlə işləmək bacarığını təsdiq edən müvafiq sənədi şəxsən təqdim etməlidirlər.

Əlavə məlumatı 012-590-81-10, 012-590-81-39 nömrəli əlaqə telefonlarından almaq mümkündür.