Bakıda inşa olunan cənub avtovağzalı fevralda istifadəyə veriləcək

Cənub, cənub-şərq və cənub-qərb bölgəsində yaşayan vətəndaşların paytaxta rahat gediş-gəlişini təmin etmək məqsədilə Lökbatan ərazisində  inşa edilən Bakı Cənub Avtostansiyası fevral ayında istifadəyə veriləcək.

YeniAvropa xəbər verir  ki, bu barədə Nəqliyyat, Rabitə və Yüksək Texnologiyalar Nazirliyi yanında Dövlət Avtomobil Nəqliyyatı Xidmətinin (DANX) ictimaiyyətlə əlaqələr sektorunun müdiri Nuridə Allahyarova məlumat verib. Onun sözlərinə görə, artıq tikinti işlərinin bir qismi başa çatdırılıb. Fevral ayında isə Bakı Cənub Avtostansiyası tam hazır vəziyyətdə vətəndaşların istifadəsinə veriləcək.

N.Allahyarova qeyd edib ki, yeni avtostansiya fəaliyyətə başladıqdan sonra Lökbatan dairəsindəki nəqliyyat xaosu aradan qalxacaq. Onun sözlərinə görə, avtostansiyanın ən böyük üstünlüyü ondan ibarətdir ki, hazırda ticarət mərkəzlərindən alış-veriş edib cənub, cənub-şərq istiqamətinə gedən sərnişinlər əvvəlcə 20 Yanvar dairəsinə, oradan Bakı Beynəlxalq Avtovağzal Kompleksinə (BBAK), daha sonra isə rayona getməlidir. Avtostansiya istifadəyə verildikdən sonra isə artıq alış-veriş edib rayona getmək istəyən vətəndaşlar, birbaşa Bakı Cənub Avtostansiyasından rayona gedə biləcəklər.

“Avtostansiya qeyri-qanuni daşımaların da qarşısını alacaq. Çox zaman sərnişinlər Lökbatandan Avtovağzala getmək əvəzinə qanunsuz sərnişindaşıma fəaliyyəti göstərən nəqliyyat vasitələrindən istifadə edir. Avtostansiya istifadəyə verildikdən sonra qanunsuz fəaliyyət göstərən nəqliyyat vasitələrinin ərazidə sərnişindaşımalarına qadağa qoyulacaq. Bu da həm avtomobillərin sıxlığını aradan qaldıracaq, insanların rahat gediş-gəlişini təmin edəcək, qanunsuz daşımaların qarşısını alacaq, həm də BBAK-ın üzərinə düşən yükü azaldacaq”, - deyə N.Allahyarova vurğulayıb.