Binəqədi rayon Polis İdarəsinin 40-cı polis bölməsinə müraciət edən Bakı şəhər sakini T.Rüstəmov dekabrın 19-na keçən gecə Sulutəpə qəsəbəsindən “VAZ-2106” markalı avtomobilinin qaçırıldığını bildirib.
Daxili İşlər Nazirliyinin mətbuat xidmətindən YeniAvropa-ya verilən məlumata görə, müraciətlə əlaqədar dərhal müvafiq tədbirlərə başlanılıb. Avtomobilin qəsəbədə hərəkətdə olduğu qısa müddətdə müəyyənləşdirilib. Əməliyyat-axtarış tədbirləri nəticəsində nəqliyyat vasitəsi həmin gün dövlət yol polis şöbəsinin əməkdaşları tərəfindən saxlanılıb.
Nəqliyyat vasitəsini qaçırmaqda şübhəli bilinənin şəxsin qəsəbə sakini Kazım Quliyev olduğu müəyyənləşib. Onun başqa bir şəxslə birgə dekabrın 18-də Lökbatan qəsəbəsində Şamaxı rayon sakini Z.Zərbalıyevin “VAZ-2103” markalı avtomobilini də oğurladığı müəyyənləşdirilib. Davam etdirilən tədbirlərlə həmin nəqliyyat vasitəsi polis əməkdaşları tərəfindən Xocasən qəsəbəsində tapılaraq sahibinə qaytarılıb.
Binəqədi rayon Polis İdarəsi nəqliyyat vasitəsini qaçırmaqda şübhəli bilinən digər şəxsin saxlanılması istiqamətində əməliyyat-axtarış tədbirlərini davam etdirir.
2793
2793
