42 min saxta avronu satmaq istərkən yaxalandılar

Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsinin əməkdaşları külli miqdarda saxta xarici valyutanı dövriyyəyə buraxmaqla ölkənin maliyyə sisteminə təhlükə yaratmağa çalışan şəxslərin ifşa olunması istiqamətində növbəti uğurlu əməliyyat tədbiri həyata keçiriblər.

DİN-in mətbuat xidmətindən YeniAvropa-ya bildiriblər ki, Baş İdarəyə ölkədə fəaliyyət göstərən banklardan birindən Fərhad və Asəf adlı şəxslərin saxta 17 min avronu 32 min 606 manata mübadilə etmələri barədə məlumat daxil olub. Təqdim edilən 500 avroluq əsginaslardan ibarət pulların saxta olması müəyyənləşdiriləndən sonra təxirəsalınmaz əməliyyat-axtarış tədbiri həyata keçirilib. Cinayəti törətməkdə şübhəli bilinən Bakı şəhər sakini Asəf Novruzov və Lənkəran şəhər sakini Fərhad Həsənzadə görülmüş tədbirlərlə saxlanılıblar.

Baxış zamanı saxlanılan şəxslərin paytaxtdakı ofislərindən əlavə olaraq saxta 25 min avro məbləğində əsginaslar və digər maddi sübutlar aşkarlanaraq götürülüb.

Həmin şəxslər ilkin ifadələrində saxta əsginasları paytaxt ərazisində və respublikanın rayonlarında fəaliyyət valyuta mübadilə mərkəzlərində satmaq məqsədilə Türkiyə Respublikasından ölkəyə gətirdiklərini bildiriblər. Ekspertizaya təqdim edilən 42 min avro yoxlanılan zaman müəyyənləşdirilib ki, həmin pulların həqiqi əsginaslardan fərqlənməməsi üçün müdafiə nişanları və eskizləri xüsusi üsulla hazırlanıb. Bu səbəbdən ilk baxışdan həmin pulların saxta olmasını müəyyənləşdirmək mümkün deyil.

Faktla bağlı Baş İdarənin istintaq şöbəsində Cinayət Məcəlləsinin 204.2-ci (Saxta pul və ya qiymətli kağızlar hazırlama, əldə etmə və ya satma, eyni əməllər xeyli miqdarda və ya əvvəllər saxta pul və ya qiymətli kağızlar hazırlama, əldə etmə və ya satmağa görə məhkum olunmuş şəxs tərəfindən törədildikdə) maddəsi ilə cinayət işi başlanıb. F.Həsənzadə və A.Novruzov barəsində məhkəmənin qərarı ilə həbs-qətimkan tədbiri seçilib, istintaq tədbirləri davam etdirilir.