İrandan Azərbaycana narkotik vasitə keçirmək istəyən şəxslər saxlanılıb

Dövlət Sərhəd Xidməti (DSX) dövlət sərhədinin etibarlı mühafizəsinin təmin olunması və narkotik vasitələrin qanunsuz dövriyyəsinə qarşı mübarizə istiqamətində tədbirləri davam etdirir.

DSX-nin mətbuat mərkəzindən YeniAvropa-ya bildiriblər ki, dekabrın 12-də “Astara” dövlət sərhədindən buraxılış məntəqəsində Azərbaycana gələn İran vətəndaşı, 2002-ci il təvəllüdlü Bargikani Naza Muhammedbaxirin üzərində Xidmətin Sərhəd Nəzarətinin əməkdaşları tərəfindən 320 qram heroin aşkarlanaraq götürülüb. Narkotik vasitənin sifarişçisinin müəyyənləşdirilməsi və saxlanılaraq məsuliyyətə cəlb olunması məqsədilə keçirilmiş təxirəsalınmaz əməliyyat-axtarış tədbirləri nəticəsində Bakı şəhər sakinləri, 1992-ci il təvəllüdlü Səfərov Kazım Ağəli oğlu və 1994-cü il təvəllüdlü Nəsirov Elyaz Taleh oğlu saxlanılıblar.

Dekabrın 13-də DSX-nin Sərhəd Qoşunlarının “Horadiz” sərhəd dəstəsinin Beyləqan rayonunun Əhmədli kəndi ərazisindəki sərhəd zastavasının xidməti ərazisində İrandan Azərbaycan istiqamətində dövlət sərhədini pozmuş 1976-cı il təvəllüdlü Bərdə rayon sakini Cəfərov Tələt Allahyar oğlu və 1977-ci il təvəllüdlü Ağcabədi rayon sakini Quliyev Namiq Allahverdi oğlu 2270 qram marixuana ilə yaxalanıblar.

Dekabrın 13-də DSX və Dövlət Təhlükəsizliyi Xidməti əməkdaşlarının birgə həyata keçirdikləri əməliyyat-axtarış tədbirləri nəticəsində Yardımlı rayonu ərazisində “Mercedes” markalı avtomobilə baxış keçirərkən salonda 1145 qram heroin aşkarlanaraq götürülüb. Avtomobildə olan Azərbaycan vətəndaşları Şəmkir rayon sakini 1991-ci il təvəllüdlü Əlizadə Vüsal Yaşar oğlu, Mingəçevir şəhər sakini 1984-cü il təvəllüdlü Soltanov Elçin Muxtar oğlu və Sumqayıt şəhər sakini 1977-ci il təvəllüdlü Hüseynov Hüseyn Novruz oğlu saxlanılıblar.

Faktlar üzrə cinayət işləri başlanılıb, zəruri əməliyyat-istintaq hərəkətləri həyata keçirilir.