Azərbaycan-BƏƏ iqtisadi əlaqələri müzakirə olunub

İqtisadiyyat naziri, Azərbaycan Respublikası Hökuməti və Birləşmiş Ərəb Əmirlikləri Hökuməti arasında iqtisadi, ticarət və texniki əməkdaşlıq üzrə birgə Hökumətlərarası Komissiyanın həmsədri Şahin Mustafayevin rəhbərlik etdiyi nümayəndə heyəti Birləşmiş Ərəb Əmirliklərində (BƏƏ) səfərdədir.

YeniAvropa xəbər verir  ki, bu haqda iqtisadiyyat Nazirliyinin mətbuat xidmətindən bildirilib. Qeyd edilib ki, səfər çərçivəsində Azərbaycan nümayəndə heyəti BƏƏ-nin baş nazirinin müavini, prezident işləri üzrə nazir Şeyx Mənsur bin Zayed Əl-Nahyan, iqtisadiyyat naziri, Hökumətlərarası Komissiyanın həmsədri Sultan Bin Səid Əl Mənsuri, eləcə də enerji və sənaye naziri Sühail Məhəmməd Fərəc əl Məzrui ilə görüşlər keçirib.

Görüşlərdə Azərbaycan və Birləşmiş Ərəb Əmirlikləri arasında mövcud olan yüksək səviyyəli siyasi münasibətlərin və həyata keçirilən qarşılıqlı səfərlərin ikitərəfli iqtisadi əlaqələrin dərinləşdirilməsi üçün əlverişli imkanlar açdığı, Azərbaycanın BƏƏ ilə iqtisadi əməkdaşlığın inkişafına önəm verdiyi vurğulanıb. Qeyd edilib ki, 2017-ci ildə Azərbaycanın Birləşmiş Ərəb Əmirliklərindəki səfirliyində ticarət nümayəndəsinin təyin olunması, Dubay şəhərinə təşkil edilmiş ixrac missiyası, habelə hər iki ölkədə baş tutan sərgilərdə qarşılıqlı iştirak ölkələrimiz arasında iqtisadiyyatın müxtəlif sahələrindəki əməkdaşlığa öz töhfəsini verməkdədir.

Müzakirələr zamanı investisiya qoyuluşu, sənaye, enerji, kənd təsərrüfatı və turizm sahələrində birgə layihələrin həyata keçirilməsi və Azərbaycan məhsullarının Birləşmiş Ərəb Əmirliklərinə ixracının genişləndirilməsi üçün böyük potensialın olduğu qarşı tərəfin diqqətinə çatdırılıb.

BƏƏ-yə səfər çərçivəsində Azərbaycan nümayəndə heyəti Dubayda "Azərbaycan Ticarət Evi"nin yaradılması işlərinin gedişi ilə tanış olub.