Bakıda “Caspian Ecology 2018” sərgisi öz işinə başlayıb

Noyabrın 14-də  “Bakı Ekspo Mərkəzi”ndə IX Azərbaycan Beynəlxalq Ətraf Mühit “Caspian Ecology 2018” sərgisi öz işinə başlayıb.

YeniAvropa xəbər verir  ki, sərginin rəsmi açılış mərasimində ekologiya və təbii sərvətlər naziri Muxtar Babayev iştirak edib. 

Nazir bildirib ki, sərginin keçirilməsində məqsəd ətraf mühitin mühafizəsi sahəsində innovativ texnologiyaları tətbiq edən beynəlxalq və yerli şirkətləri, dövlət və qeyri-hökumət təşkilatlarını bir araya gətirmək, perspektivli əməkdaşlıq əlaqələri qurmaq və təcrübə mübadiləsi aparmaqdır. M.Babayev vurğulayıb ki, ekologiya mövzusuna həsr olunan sərgilərin keçirilməsi ətraf mühitə dost texnologiyaların nümayiş etdirilməsi ilə yanaşı, əhalinin ekoloji maarifləndirilməsi baxımından mühüm əhəmiyyət daşıyır.

Qeyd edilib ki, sərgidə 10-a yaxın ölkədən, o cümlədən Almaniya, Böyük Britaniya, Finlandiya, İtaliya, Türkiyədən olan 43 şirkət öz məhsul və təcrübələrini nümayiş etdirəcək. "Çox fərəhləndirici haldır ki, ölkəmizdə ətraf mühit mövzusuna həsr olunan sərgilərin keçirilməsi artıq ənənəyə çevrilib, bu sərgilər beynəlxalq şirkətlərin maraq dairəsinə daxil olub. Azərbaycan bu sahəyə çox böyük önəm verən ölkələrdən biridir",-deyə Muxtar Babayeb bildirib.

Qeyd edək ki, 3 gün davam edəcək “Caspian Ecology” sərgisi Azərbaycan Respublikası Ekologiya və Təbii Sərvətlər Nazirliyi (ETSN), eləcə də IDEA (Ətraf mühitin mühafizəsi naminə beynəlxalq dialoq) İctimai Birliyi tərəfindən dəstəklənir. Sərginin təşkilatçısı qismində isə “Caspian Event Organisers” (CEO) şirkəti çıxış edir.

Ümumilikdə, “Caspian Ecology 2018” sərgisində təbii resurslardan səmərəli istifadə sahəsində ən son məhsullar, sülb (bərk) tullantıların toplanması və utilizasiyası sistemləri, eləcə də alternativ energetika üzrə müasir avadanlıq nümunələri və digər məhsullar nümayiş etdiriləcək.

Şirkətlər tullantıların utilizasiyası və təkrar emalı üçün avadanlıqlar, sutəmizləmə sistemləri, neft və qaz kəşfiyyatı və emalı xidmətləri, kağız, karton istehsalı ilə yanaşı bir sıra digər məhsulları da təqdim edəcəklər.