Şəmkirdə 149 ədəd partlamamış hərbi sursat aşkarlanıb

Noyabrın 7-də saat 12:37-də Daxili İşlər Nazirliyinin “102-Zəng Mərkəzi” xidmətindən, saat 13:06-da isə Fövqəladə Hallar Nazirliyinin Böhran Vəziyyətlərində İdarəetmə Mərkəzindən Azərbaycan Respublikası Ərazilərinin Minalardan Təmizlənməsi üzrə Milli Agentliyə (ANAMA) Şəmkir rayonunun Dəllər qəsəbəsində partlamamış hərbi sursatın tapılması barədə məlumat daxil olub.

YeniAvropa xəbər verir  ki, bu barədə ANAMA-dan bildirilib. Qeyd edilib ki, məlumata əsasən agentliyin xüsusi mobil çevik əməliyyat qrupu və Şəmkir Rayon Polis Şöbəsinin əməkdaşları dərhal həmin əraziyə göndərilib.

Qurumun mütəxəssisləri və rayon polis şöbəsinin əməkdaşları ərazidə Bakı-Ələt-Qazax-Gürcüstan avtomobil yolunun 381-ci kilometrliyinə baxış keçiriblər. Təxirəsalınmaz operativ əməliyyat-axtarış tədbirləri nəticəsində 149 ədəd partlamamış hərbi sursat (iki ədəd F-1 əl qumbarası, 147 ədəd 7,62 millimetrlik patron), iki ədəd boş F-1 əl qumbarası və bir ədəd avtomat darağı aşkarlanıb. Həmin sursat zərərsizləşdirilməsi üçün götürülərək agentliyin mərkəzi məhvetmə ərazisinə daşınıb.

Hərbi sursatların tapıldığı yerin ətrafında 200 kvadratmetr əraziyə yerüstü baxış keçirilib, əlavə təhlükəli əşya və qurğu aşkarlanmayıb.

Ümumilikdə agentlik tərəfindən yanvarın 1–dən noyabrın 7-dək 5437 ədəd partlamamış hərbi sursat, bir silah, piyada əleyhinə 2, tank əleyhinə 10 mina və 73 kiloqram partlayıcı maddə aşkarlanaraq zərərsizləşdirilib. Bu müddətdə 396 min 903 kvadratmetr ərazi yoxlanılıb.