Misiri-Azərbaycan dostluq əlaqələri inkişaf edir

Misirin Qalubiyyə vilayəti ilə Abşeron rayonunu dostluq telləri bağlayır. Vaxtaşırı hər iki regionun nümayəndələri qarşılıqlı səfərlər edir, əməkdaşlıq perspektivlərini müəyyənləşdirirlər.

YeniAvropa xəbər verir  ki, VI Bakı Beynəlxalq Humanitar Forumu çərçivəsində Azərbaycanda olan Misirin Qalubiyyə vilayətinin qubernatoru Alaa Abdelhalimin başçılıq etdiyi nümayəndə heyəti Abşeron rayonuna səfər edib.

Abşeron rayon İcra Hakimiyyətinin başçısı İradə Gülməmmədova qonaqlara rayon haqqında məlumat verib. Bildirilib ki, rayonun Xırdalan şəhəri də daxil olmaqla, 15 kənd və qəsəbəsində 500 mindən çox sakin yaşayır. Abşeronda həm kənd təsərrüfatının, həm də sənayenin inkişaf etdiyini vurğulayan icra hakimiyyətinin başçısı rayonun mədəniyyəti, iqtisadiyyatı, tarixi abidələri, turizm potensialı barədə də danışıb.

Bildirilib ki, 2007-ci ildə Qalubiyyə ilə Abşeron rayonunun qardaşlaşması barədə protokol imzalanıb və sənədin bütün müddəaları uğurla yerinə yetirilir. Abşeronda Azərbaycan-Misir dostluq parkı, Xırdalan şəhərinin mərkəzində Qalubiyyə küçəsi, Misir-ərəb təmayüllü məktəb, Qalubiyyədə isə Heydər Əliyev parkı, Azərbaycan küçəsi və Azərbaycan-Misir dostluq məktəbinin olması iki ölkə arasında dostluğun əyani təzahürüdür.

Abşerona ilk dəfədir səfər etdiyini vurğulayan qubernator Alaa Abdelhalim hər iki tərəf arasında imzalanan sənəddə kənd təsərrüfatı, sənaye, mədəniyyət, xeyriyyə və digər sahələrdə əməkdaşlığın inkişaf etdirilməsinin, bu istiqamətlərdə təcrübə mübadiləsinin aparılmasının nəzərdə tutulduğunu xatırladıb.

Qonaq Misir Ərəb Respublikasının Azərbaycanın suverenliyini və ərazi bütövlüyünü birmənalı şəkildə tanıdığını və Dağlıq Qarabağ münaqişəsinin nizamlanması ilə əlaqədar olan bütün məsələlərdə ölkəmizi dəstəklədiyini vurğulayıb.

Qalubiyyə vilayətinin qubernatoru Abşeron rayonunun Azərbaycan ilə Misir arasında qarşılıqlı əlaqələrin inkişafında xüsusi rol oynadığını, digər rayonların da Misirin əyalətləri ilə belə işgüzar əlaqələr qurmasına ehtiyac duyulduğunu bildirib.

Görüşdə iştirak edən Misirin Azərbaycandakı səfiri Adel İbrahim xalqlarımız arasındakı münasibətlərin tarixi kökləri barədə danışıb.

Sonra qonaqlar Xırdalan şəhərindəki Misir-ərəb təmayüllü 9 saylı orta məktəbdə olublar. Məktəblilərin əl işlərindən ibarət sərgi onlarda böyük təəssürat doğurub. Burada nümayəndə heyəti Azərbaycan-Misir dostluq guşəsinə baxıblar. Azərbaycanlı şagirdlər ərəb dilində şeirlər söyləyiblər.

Qonaqlar Xırdalandakı Qalubiyyə küçəsində yerləşən Azərbaycan-Misir dostluq parkını da gəziblər.