Bakıya 21 millimetr yağıntı düşüb

Ekologiya və Təbii Sərvətlər Nazirliyinin Milli Hidrometeorologiya Departamenti sentyabrın 22-si axşamdan 23-ü səhərədək müşahidə olunmuş faktiki hava şəraitini açıqlayıb.

Departamentdən YeniAvropa-ya bildiriblər ki, sentyabrın 22-si hava gündüz əsasən yağmursuz keçib, lakin 22-si axşamdan 23-ü səhərədək şimşək çaxıb, arabir yağış yağıb, bəzi şimal və qərb rayonlarında leysan xarakterli intensiv olub.

Bakıya 21, Oğuza 31, Qəbələyə 28, Kişçaya (Şəki) 27, Ordubada 22, Mingəçevirə 15 millimetr yağıntı düşüb.

Bakıda və Abşeron yarımadasında sentyabrın 23-də arabir yağış yağacağı gözlənilir. Bəzi yerlərdə leysan xarekterli olacağı, şimşək çaxacağı ehtimalı var. Cənub-şərq küləyi əsəcək, sürəti saniyədə 5-10 metr təşkil edəcək. Havanın temperaturu gündüz 22-24°, axşam 20° isti olacaq.

Sentyabrın 24-də havanın dəyişkən buludlu olacağı, arabir tutulacağı proqnozlaşdırılır. Gecə və səhər bəzi yerlərdə yağış yağacağı, şimşək çaxacağı ehtimalı var. Hava gündüz əsasən yağmursuz keçəcək. Şimal-şərq küləyi əsəcək, saniyədə 3-8 metr təşkil edəcək.

Havanın temperaturunun gecə 16-19°, gündüz 23-26° isti olacağı bildirilir.

Xəbərdarlığa görə, sentyabrın 23-də Bakıda və Abşeron yarımadasında arabir yağış yağacağı gözlənilir. Gecə və səhər bəzi yerlərdə leysan xarekterli olacağı ehtimalı var. Havanın temperaturu 2-4° enəcək.

Azərbaycanın rayonlarında sentyabrın 23-də bəzi yerlərdə şimşək çaxacağı, arabir yağış yağacağı gözlənilir. Ayrı-ayrı yerlərdə leysan xarakterli intensiv olacağı, dolu düşəcəyi ehtimalı var. Qərb küləyi əsəcək, sürəti saniyədə 5-10 metr təşkil edəcək, ayrı-ayrı yerlərdə arabir 18-23 metrədək güclənəcək. Havanın temperaturu gecə 14-19°, gündüz 23-28° isti, dağlarda gecə 6-11°, gündüz 13-18° isti olacaq.

Xəbərdarlığa əsasən, sentyabrın 24-ü gündüzədək ölkə ərazisində qeyri-sabit hava şəraitinin davam edəcəyi, bəzi yerlərdə şimşək çaxacağı, arabir yağış yağacağı gözlənilir. Ayrı-ayrı yerlərdə leysan xarakterli intensiv olacağı, dolu düşəcəyi ehtimalı var. Qərb küləyinin sürəti saniyədə 15-20 metr təşkil edəcək, ayrı-ayrı yerlərdə arabir 23-25 metrədək güclənəcək. Çaylarda sululuğun artacağı, bəzi dağ çaylarından qısamüddətli daşqın və sel keçəcəyi ehtimal olunur. Havanın temperaturu 3-5° enəcək.