Samir Şərifov Asiya İnkişaf Bankının Rəhbərlər Şurasının illik toplantısında çıxış edib

Cənubi Koreyanın İnçion şəhərində Asiya İnkişaf Bankının (AİB) Rəhbərlər Şurasının 56-cı illik toplantısının rəsmi açılış mərasimi keçirilib. “Asiyanın dirçəldilməsi: bərpa, yenidən əlaqə və islahat” mövzusu altında keçirilən toplantı COVID-19 pandemiyasının yayılmasından sonra ilk dəfə əyani formatda baş tutub.

Maliyyə Nazirliyindən YeniAvropa-ya bildirilib ki, iclasda Azərbaycanı maliyyə naziri, AİB-in Rəhbərlər Şurasının üzvü Samir Şərifovun rəhbərlik etdiyi nümayəndə heyəti təmsil edib.

Toplantının rəsmi açılış mərasimində çıxış edən Koreya Respublikasının Prezidenti Yun Sok Yol və AİB-in prezidenti Masatsuqu Asakava Asiya və Sakit Okean hövzəsi ölkələrinin üzləşdiyi problemlər, yoxsulluğun aradan qaldırılması istiqamətində həyata keçirilən tədbirlər, postpandemiya dövründə yaranan yeni iqtisadi çağırışların dəstəklənməsi, region ölkələrinin inklüziv inkişaf problemləri, o cümlədən qlobal iqlim dəyişikliklərinə qarşı görülən tədbirlərdən danışıblar.

Qlobal miqyasda artan inflyasiya təzyiqlərinin region ölkələri üçün təsirsiz ötüşmədiyini bildirən M.Asakava hərtərəfli tərəqqi və artımın təmin edilməsində vacib olan qarşılıqlı əməkdaşlıq və inteqrasiyanın AİB üçün əsas çağırışlar olduğunu vurğulayıb.

Bankın Rəhbərlər Şurası AİB-in 2022-ci il üzrə illik hesabatının müzakirəsi, maliyyə hesabatlılığına və müstəqil auditorların rəylərinə daxili nəzarət üzrə İdarə Heyətinin hesabatı, 2023-cü il üçün büdcənin təsdiqi və digər məsələlərlə bağlı müvafiq qərarlar qəbul edib.

Rəhbərlər Şurasında təmsil olunan nümayəndə heyətlərinin rəhbərləri bank tərəfindən 2022-ci ildə görülən işləri yüksək qiymətləndirərək, inkişaf etməkdə olan ölkələrə bundan sonra da inkişafyönümlü kreditlərin verilməsi və texniki yardımların göstərilməsinin vacibliyini vurğulayıblar.

Mayın 4-də illik toplantı çərçivəsində keçirilən biznes sessiyada çıxış edən Azərbaycanın maliyyə naziri Samir Şərifov ölkəmizin son illərdə əldə etdiyi sosial-iqtisadi nailiyyətlərdən bəhs edib. Nazir builki illik toplantının pandemiyadan sonra əyani formatda təşkil edilən ilk tədbir, əlamətdar hadisə kimi qiymətləndirərək, prezident M.Asakavanın rəhbərliyi ilə AİB-in pandemiya dövründə də güclü, sürətli, müvafiq və effektiv regional inkişaf bankı kimi fəaliyyətini davam etdirdiyini, pandemiya zamanı inkişaf etməkdə olan üzv ölkələrə ciddi dəstək göstərdiyini bildirib.

S.Şərifov çıxışında Ukraynadakı müharibə, artan inflyasiya, davam edən ərzaq böhranı və tədarük zəncirindəki daralmanın inkişaf etməkdə olan üzv ölkələrə böyük təzyiq göstərdiyinə diqqət çəkərək, bunlara paralel olaraq yaşıl keçid və iqlim dəyişikliyi kimi qlobal və uzunmüddətli problemlərin həllinə daha çox ehtiyac olduğunu vurğulayıb və bütün bunların daha sıx əməkdaşlıq şəraitində AİB kimi çoxtərəfli inkişaf institutlarının fəal iştirakını zəruri etdiyini deyib.

“Biz, həmçinin AİB-in kritik maliyyə boşluqlarının aradan qaldırılmasında və davam edən şoklara cavab verməkdə inkişaf etməkdə olan üzv ölkələrə dəstək verən sürətli ödəniş alətləri üzrə artan öhdəliklərini müsbət qiymətləndiririk”, - deyə S.Şərifov bildirib.

Maliyyə naziri çıxışında Azərbaycanın 30 ildən artıq işğal altında olan və 2020-ci ildə işğaldan azad olunan Qarabağ və Şərqi Zəngəzur iqtisadi rayonlarında aparılan bərpa və yenidənqurma işlərindən də danışıb. Bildirib ki, Azərbaycan hökuməti Prezident İlham Əliyevin rəhbərliyi ilə işğaldan azad edilmiş ərazilərdə genişmiqyaslı yenidənqurma işlərinin aparılmasını və keçmiş məcburi köçkün və qaçqınların öz doğma kəndlərinə, qəsəbələrinə və şəhərlərinə geri qaytarılmasını nəzərdə tutan Böyük Qayıdış proqramına start verib.

İşğal zamanı bütün fiziki və sosial infrastrukturun tamamilə dağıdıldığını qeyd edən S.Şərifov yenidənqurma tədbirlərindən əvvəl çoxlu sayda mina təmizləmə işlərinin həyata keçirilməli olduğunu vurğulayıb. Son 3 ildə Azərbaycanın yenidənqurma və bərpa işlərinə 6,6 milyard dollardan çox vəsait sərf etdiyini qeyd edən nazir regionun strateji coğrafi mövqeyinə görə böyük iqtisadi potensiala malik olduğunu diqqətə çatdırıb.

İllik toplantı çərçivəsində maliyyə naziri Samir Şərifov bir sıra ikitərəfli görüşlər keçirib. Nazir AİB-in prezidenti Masatsuqu Asakava ilə görüşdə ölkəmizin iqtisadi vəziyyəti, Prezident İlham Əliyevin rəhbərliyi ilə hökumət tərəfindən həyata keçirilən islahatlar, o cümlədən işğaldan azad edilmiş Qarabağ və Şərqi Zəngəzur ərazilərində aparılan bərpa və yenidənqurma işləri barədə məlumat verib. S.Şərifov qeyd edib ki, işğaldan azad edilmiş ərazilərdə nəqliyyat dəhlizlərinin inkişafı regional əməkdaşlıq və inteqrasiya səylərinə böyük təkan verəcək və bununla da regionda uzunmüddətli sülh və tərəqqiyə nail olunacaq. Bildirilib ki, Qarabağ və Şərqi Zəngəzur iqtisadi rayonlarında yaşıl enerji zonalarının və bərpa olunan enerji mənbələrinin inkişaf etdirilməsi üçün böyük potensial var və bununla da gələcəkdə Avropaya, o cümlədən region ölkələrinə enerji təchizatının həyata keçirilməsində Azərbaycan əhəmiyyətli rol oynayacaq. O cümlədən 2020-ci ilin iyun ayında Asiya İnkişaf Bankının təşəbbüsü ilə Prezident İlham Əliyevlə bankın prezidenti Masatsuqu Asakava və bankın rəhbərliyində təmsil olunan digər nümayəndələr arasında videokonfrans formatında keçirilən görüşü xatırladan S.Şərifov müzakirə edilən enerji, infrastruktur, suvarma, peşə təhsili, kiçik və orta sahibkarlığın maliyyələşdirilməsi layihələri vasitəsilə AİB-in Azərbaycanın dayanıqlı inkişafına göstərdiyi dəstəyin önəmini vurğulayıb. Öz növbəsində, Azərbaycanın davamlı iqtisadi inkişafını qeyd edən Masatsuqu Asakava ölkəmizdə həyata keçirilən layihələri yüksək qiymətləndirib. Eyni zamanda, AİB ilə Azərbaycan arasında birgə həyata keçirilən layihələrin əhəmiyyətini vurğulayaraq, bu əməkdaşlığın genişlənəcəyinə əminliyini ifadə edib.

Bundan başqa, toplantı çərçivəsində nazir S.Şərifov Azərbaycanı bankın İdarə Heyətində təmsil edən avstraliyalı icraçı direktor Rachel Thompson ilə görüşüb. Görüşdə əməkdaşlığın hazırkı vəziyyəti və perspektivləri, birgə layihələrin həyata keçirilməsi imkanları, o cümlədən qarşılıqlı maraq doğuran digər məsələlərə dair fikir mübadiləsi aparılıb.