Quba “ASAN həyat” Kompleksində möhtəşəm Yeni il konserti

Dekabrın 29-da Quba “ASAN həyat” Kompleksində təşkil olunan Yeni il konsertində böyük coşqu yaşanıb.

YeniAvropa xəbər verir ki, “ASANla röyalarınız gerçəkləşir” şüarı ilə keçirilən konsert proqramını Mədəniyyət və Turizm Nazirliyi, Quba Rayon İcra Hakimiyyəti və “ASAN xidmət” birgə təşkil edib.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri İnam Kərimov çıxış edərək, tədbir iştirakçılarını qarşıdakı bayramlar münasibətilə təbrik edib, xoş arzularını çatdırıb.

İnam Kərimov Prezident İlham Əliyev tərəfindən son illərdə dövlət idarəçiliyinin təkmilləşdirilməsi və modernləşdirilməsi sahəsində həyata keçirilən islahatlar barədə danışaraq, bu islahatların tərkib hissəsi olan “ASAN xidmət”in uğurlu fəaliyyəti barədə məlumat verib.

Sədr bildirib ki, Prezident İlham Əliyev “ASAN xidmət” işçilərinin peşə bayramı gününün təsis edilməsi haqqında Sərəncam imzalayıb. Sərəncama əsasən hər il dekabrın 29-u Azərbaycan Respublikasında “ASAN xidmət” işçilərinin peşə bayramı günü kimi qeyd ediləcək.

Quba Rayon İcra Hakimiyyətinin başçısı Ziyəddin Əliyev də çıxışında ölkəmizdə aparılan uğurlu islahatlardan söz açıb, rayonda görülən abadlıq-quruculuq işləri haqqında məlumat verib. Quba şəhərində yeni açılan, vətəndaş rahatlığına, həyat standartlarının yaxşılaşdırılmasına xidmət edən “ASAN xidmət” regional mərkəzinin əhəmiyyəti xüsusi vurğulanıb.

Çıxışlardan sonra Quba rayonunun ictimai-siyasi həyatında fəallığı ilə seçilən bir qrup şəxs mükafatlandırılıb.

Daha sonra 31 Dekabr - Dünya Azərbaycanlılarının Həmrəylik Günü, “ASAN xidmət”in 5, “ASAN Radio”nun isə 2 yaşına həsr olunan möhtəşəm konsert proqramına başlanılıb.

Rəqs qruplarının ardınca səhnəyə çıxan Əməkdar Artist Röya sevilən mahnılarını ifa edib.