Bakıda daha bir ərəb turist "Viaqra"dan  öldü

Nərimanov rayonunda yerləşən “Caspian Business Otel”də İraq Respublikasının vətəndaşı dünyasını dəyişib.

YeniAvropa xəbər verir  ki, 1967-ci il təvəllüdlü Ammar Al Ce Cuborinin halı pisləşdiyindən otel rəhbərliyi təcili yardım çağırıb və akademik Mirqasımov adına Respublika Klinik Xəstəxanasına aparılıb. Ancaq həkimlərin səylərinə baxmayaraq ərəbin təzyiqini aşağı sala bilməyiblər və 51 yaşlı əcnəbi dünyasını dəyişib. Meyit müayinə olunmaq üçün Məhkəmə Tibbi Ekspertiza və Pataloji Anatomiya Birliyinin Nərimanov rayon şöbəsinə aparılıb.

Oteldən verilən açıqlamaya görə, Ammar Al Ce Cuborinin avqust ayının 3-dən turpaketlə İraqdan Azərbaycana turist kimi gəlib, ayın 10-da ölkəsinə qayıtmalı imiş.

“Hadisə ötən gün axşam saat 18 radələrində baş verib, halı pisləşdi, bizə məlumat verdi, biz də təcili yardım çağırdıq, apardılar xəstəxanaya. Sonra məlumat gəldi ki, dünyasını dəyişib. Biz də ölüm faktı ilə bağlı nümayəndəliyə məlumat verdik. Ümumiyyətlə onun ölümünə ilkin səbəb kimi cinsi gücü artıran dərmanları həddindən artıq çox qəbul etməsidir, onun da üstündən enerji içkilərini içirlər. Bu zamanda ürəyin fəaliyyəti pozulur və belə hallar yaranır”, -deyə oteldən bildirilib.

Faktla bağlı Nərimanov rayon prokurorluğunda araşdırmalara başlanılıb.

Qeyd edək ki, son illər Bakıya axın edən ərəblərlə yüngül həyat tərzi keçirən qadınlar arasında məcaralar tez-tez baş verir.  Ərəblərin Bakıda əxlaqsızlıqla məşğul olması tez-tez sosial şəbəkələrdə və KİV-lərdə ictimai narazılığa səbəb olur.

Xatırladaq ki,ötən il də Bakıdakı otellərin birində analoji hal baş vermişdi.