Bir aydır Kürdəmir rayonun Dəyirmanlı və Yenikənd kəndlərinin transformatoru qismən sıradan çıxıb. Sakinlər dəfələrlə “Azərişıq” dövlət şirkətinə müraciət etsələr də, problem həllini tapmır.
YeniAvropa xəbər verir ki, bu haqda kənd sakinləri "Marja"ya danışıblar. Bildiriblər ki, transformatorun bloklarından biri sıradan çıxıb və onun tamamilə yenilənməsinə ehtiyac var. Bu səbəbdən evlərə verilən elektrik enerjisinin gücü 130-150 voltdur. Belə bir gərginlik ilə ev cihazlarını işlətmək mümkün deyil, elektrik lampaları közərir.
Son bir ay ərzində dəfələrlə “Azərişıq”a müraciətdən sonra dünən rayon elektrik şəbəkəsinin nümayəndələri kəndə baş çəkiblər.
Sakinlərin sözlərinə görə, “Azərişıq”ın nümayəndələri bildiriblər ki, hazırda yeniləmək üçün transformatora malik deyillər. Əgər kənd sakinləri 700 manat yığıb versələr transformatorun yenilənməsini təşkil edə bilərlər.
Reallıq budur ki, havanın daha isti olduğu Kürdəmirdə əhali əziyyət çəkir, soyuducu və kondisioner kimi vacib cihazları işlədə bilmirlər.
2492
2492
