Balakəndə leysan körpüləri uçurub, Zaqatala-Gürcüstan yolunu dağıdıb

13:26 12-06-2018 | 2534

Dünən axşandan başlayaraq ölkənin şimal-qərb bölgəsində qeyri-sabit hava şəraiti davam edir. YeniAvropa xəbər verir ki, dağlara yağan intensiv və leysan yağışlar nəticəsində Balakənin Katex kəndi ərazisindən keçən, mənbəyini dağlardan götürən Dəliçay məcrasından çıxıb.

Çayın sağ və sol sahilindəki 400-ə yaxın evin həyətyanı sahəsini su basıb, 50-dən çox evə su dolub. Sel ev quşlarını və xırdabuynuzlu heyvanları aparıb, 10-dan çox həyətyanı sahənin hasarını dağıdıb.

Sel suları Dəliçayın üzərindəki 8 kiçik körpünü də uçurub, ərazidən keçən içməli su, elektrik və qaz xəttlərinə ziyan dəyib.

Kənd sakinlərinə məxsus, ümumilikdə 150 hektar olmaqla, 10 hektarı tütün, 140 hektar buğda, arpa və qarğıdalı sahələri sel suları altında qalıb.

Dəliçayın keçdiyi ərazidəki daxili kənd yolları yararsız hala düşüb. Yevlax-Zaqatala-Gürcüstan magistral yolunun Katex kəndi ərazisindən keçən hissəsini sel suları dağıdıb.

Hazırda Balakən rayon Fövqəladə hallar komissiyasının üzvləri hadisə yerində iş aparır.(APA)