Ümumdünya Velosiped Günü münasibətilə Bakıda veloyürüş keçirilib

20:37 03-06-2018 | 2002

İyunun 3-də Türkmənistanın Azərbaycandakı səfirliyi və Dənizkənarı Bulvar İdarəsinin təşkilatçılığı ilə Bakıda kütləvi veloyürüş təşkil ediblər. Səfirlikdən YeniAvropa-ya verilən məlumatda qeyd edilib ki, veloyürüş BMT-nin Baş Assambleyasının 72-ci sessiyasının 82-ci iclasında 56 dövlətin həmmüəllifliyi ilə 3 iyun tarixinin Türkmənistanın təqdimatına əsasən Ümumdünya Velosipedin Günü elan edilməsi haqqında qətnaməyə həsr olunub.

İdman tədbirində diplomatik korpusun, kütləvi informasiya vasitələrinin, tələbə gənclər təşkilatlarının nümayəndələri, həmçinin velosiped sürmək həvəskarı olan Bakı sakinləri iştirak ediblər.

Veloyürüşün marşrutu Dənizkənarı Milli Parkın ərazisində mənzərəli və gözəl guşələrdən birində xüsusi olaraq ayrılmış velosiped yolu boyunca keçirdi.

Dövlət Bayrağı Meydanından başlanan veloyürüş Azərbaycan Xalça Muzeyinin binası yanında başa çatıb.

Ümumdünya Velosipedin Gününə həsr edilmiş yarış dostluq şəraitində keçib, iştirakçılarda ruh yüksəkliyi və idman şövqü ilə yadda qalıb.