Gəncə 2019-cu il üçün Avropa İdman Şəhəri tituluna layiq görülüb

Gəncə 2019-cu il üçün Avropa İdman Şəhəri tituluna layiq görülüb.

YeniAvropa xəbər verir  ki, bu münasibətlə Gəncə şəhərində idman paradı keçirilib.

Beş mindən çox parad iştirakçısı hərbi orkestrin müşayiəti ilə Gəncə Dövlət Universitetinin 3-cü tədris binasının önündən Heydər Əliyev prospekti boyunca şəhərin baş meydanına yürüş edib. Olimpiya, dünya və Avropa çempionları, şəhərin idman məktəblərinin məşqçi-müəllimləri və şagirdləri, Kəpəz Peşəkar Futbol Klubunun heyəti, orta məktəblərin “Şahin”ləri, habelə tələbə-gənclər Gəncənin 2019-cu il üçün Avropa İdman Şəhəri tituluna layiq görülməsini coşqu ilə qarşılayıblar. Şəhər icra hakimiyyətinin və Gənclər və İdman Baş İdarəsinin təşkilatçılığı ilə keçirilən parada Yeni Azərbaycan Partiyası Gəncə şəhər təşkilatının fəal gəncləri də qoşulub.

Gəncənin mərkəzi meydanına gələn parad iştirakçıları burada alqışlarla qarşılanıblar. Havaya rəngli şarlar və sülh rəmzi olan göyərçinlər buraxılıb.

Şəhər icra hakimiyyətinin başçısı Elmar Vəliyev qeyd edib ki, 2016-cı ildə Avropanın Gənclər Paytaxtı, 2017-ci ildə MDB ölkələrinin Mədəniyyət Paytaxtı olan Gəncə “ACES Europe” təşkilatı tərəfindən 2019-cu il üçün Avropanın İdman Şəhəri tituluna layiq görülüb. Bu münasibətlə şəhər sakinlərini təbrik edən Elmar Vəliyev deyib: “Gələn il Gənclər və İdman Nazirliyi, Təhsil Nazirliyi, həmçinin digər müvafiq qurumlarla birgə şəhərdə müxtəlif layihələr reallaşdırılacaq. Çalışacağıq ki, Avropanın İdman Şəhəri adını layiqincə daşıyaq”.

Diqqətə çatdırılıb ki, Gəncədə hazırda üç idman məktəbi fəaliyyət göstərir. Bu məktəblərin yetirmələri həm ölkə, həm Avropa, həm də dünya miqyaslı yarışlarda yüksək nailiyyətlər qazanırlar. Şəhərdə peşəkar və həvəskar futbol klubları yaradılıb.

Paradda idmançıların nümunəvi çıxışları və “RedBull” şirkətinin təşkil etdiyi futbol oyunu maraqla izlənilib.

Qeyd edək ki, “ACES Europe” - Avropanın İdman Şəhərləri və Paytaxtları Federasiyası Avropa Parlamentinin idman siyasətini həyata keçirən təşkilatdır. “ACES Europe” hər il 9-19 şəhəri “Avropa İdman Şəhəri”, 1 şəhəri isə “Avropa İdman Paytaxtı” titulu ilə təltif edir. Layihə dörd ildir ki, reallaşdırılır.