ADNSU-da 30 aprel terror qurbanlarının xatirəsi anılıb

Azərbaycan Dövlət Neft Akademiyasında (indiki Azərbaycan Dövlət Neft və Sənaye Universiteti) törədilmiş faciədən doqquz il keçir. Bu münasibətlə ADNSU-da anım mərasimi keçirilib.

ADNSU-dan YeniAvropa-ya bildiriblər ki, terror qurbanlarının yaxınlarının, universitetin müəllim və tələbələrinin iştirak etdikləri anma mərasimi faciə qurbanlarının xatirəsinə qoyulmuş barelyefin önündə başlanıb. Terror qurbanlarının xatirəsini dərin ehtiramla yad edən tədbir iştirakçıları barelyefin önünə əklil qoyub, gül dəstələri düzüblər.

ADNSU-nun rektoru, professor Mustafa Babanlı bu dəhşətli hadisənin hər kəsin qəlbində dərin iz buraxdığını bildirib. ADNSU-nun həmin gün çox dəyərli müəllim və tələbələrini itirdiyini deyən rektor onların xatirəsinin daim əziz tutulacağını vurğulayıb.

Tədbir iştirakçıları 30 aprel terror qurbanları haqqında xatirələrini bölüşüblər.

Xatırladaq ki, 2009-cu il aprelin 30-da saat 9.30 radələrində keçmiş Azərbaycan Dövlət Neft Akademiyasının (ADNA) Bakı şəhəri Dilarə Əliyeva küçəsində qaz-neft mədən və neft mexanikası fakültələrinin yerləşdiyi ikinci korpusuna daxil olan cinayətkarın birinci mərtəbədən altıncı mərtəbəyədək qarşısına çıxan şəxslərə “Makarov” tipli tapançadan atəş açması nəticəsində 12 nəfər həlak olub, 13 nəfər müxtəlif dərəcəli bədən xəsarətləri alıb. Gülləyə tuş gələnlər arasında ADNA-nın professorları, müəllimləri, laborantları və tələbələri olublar.

Hadisə yerinə dərhal polisin xüsusi təyinatlı nizami hissəsinin, ərazi polis və prokurorluq orqanlarının məsul əməkdaşları gəliblər. Polis tərəfindən zərərsizləşdiriləcəyini görən silahlı cinayətkar özünü öldürüb.

Cinayəti törətmiş şəxsin üstündən 1980-ci il təvəllüdlü Gürcüstan vətəndaşı Qədirov Fərda Əsəd oğluna məxsus şəxsiyyət vəsiqəsi, “Makarov” tipli tapança, habelə hər biri 40 güllə tutumlu və içərisində 71 güllə olan xüsusi üsulla hazırlanmış 3 patrondaş, 2 tapança sandıqçası aşkarlanaraq götürülüb.

Cinayət işi üzrə təqsirli bilinən dörd nəfər də layiqli cəzalarını alıblar.