Azərbaycan vərəmin ən çox yayıldığı 30 ölkə arasında yer alır

24 mart Beynəlxalq Vərəmlə Mübarizə Günüdür. Bu xəstəlik bir çox ölkələrdə olduğu kimi Azərbaycanda da geniş yayılıb. 

Azərbaycanda vərəməyoluxma ən çox kişilər arasındadır. Vərəmə yoluxanların 56 faizini kişilər, 32 faizini qadınlar, 12 faizini isə uşaqlar təşkil edir.

YeniAvropa xəbər verir ki, bu barədə "Sağlamlığa Xidmət" ictimai birliyinin icraçı direktoru, Vərəmlə Mübarizə üzrə Avropa Koalisiyasının İdarə heyətinin üzvi Pərvanə Vəliyeva məlumat verib. 

Vərəmlə Beynəlxalq Mübarizə Gününə həsr olunan tədbirdəki çıxışında Pərvanə Vəliyeva bildirib ki, vərəməyoluxma daha çox 18-29 yaş aralığında qeydə alınıb.

Vərəm əleyhinə QHT Koalisiyasının rəhbəri Elçin Muxtarlı isə deyib ki, bu xəstəlik yoluxucu xəstəliklər arasında ən çox ölümə səbəb olan xəstəlikdir. Hər il 1,5 milyon insan bu xəstəlikdən dünyasını dəyişir. 1882-ci ildə ilk dəfə olaraq aşkarlanan bu xəstəliyinin qarşısı o zamandan bu günədək alınmayıb.

QHT rəhbəri bildirir ki, Azərbaycan vərəmin ən çox yayıldığı 30 ölkə sırasında yer alıb:

"Azərbaycan dərmana davamlı vərəmi xəstəliyinin ən çox yayıldığı 30 ölkə arasındadır. Bu isə o deməkdir ki, dünyada yayılan vərəmin 87 faizi məhz bu 30 ölkənin payına düşür. Çalışmalıyıq ki, Azərbaycan qarşıdakı illərdə nəinki 30, heç 100 ölkə arasında da yer almasın. Vərəmin qarşısını almaq üçün onun ocaqlarını, mənbələrini tapmalıyıq".

Qeyd edək ki, ÜST-ün məlumatına görə, Azərbaycanda 2018-ci ildə 880, 2019-cu ildə isə  610 nəfər vərəmdən dünyasını dəyişib.