Daxili İşlər Nazirliyinin (DİN) “102” Zəng Mərkəzi Xidmətinə müraciət edən Bakı şəhər sakini Nail Quliyev avtomobilinin oğurlanması barədə məlumat verib. DİN-nin mətbuat xidmətindən YeniAvropa-ya bildiriblər ki, Nizami Rayon Polis İdarəsinin 23-cü polis bölməsi əməkdaşları tərəfindən aparılan araşdırmalarla “Opel” markalı avtomobilin rayonun O.Vəliyev küçəsindən qaçırılması müəyyənləşdirilib.
Polis əməkdaşlarının keçirdikləri əməliyyat-axtarış tədbirləri nəticəsində avtomobil M.Abbasov küçəsində tapılıb. Onu oğurlamaqda şübhəli bilinən şəxs saxlanılaraq avtomobillə birlikdə polis bölməsinə gətirilib. Araşdırmalarla həmin şəxsin Bakı şəhər sakini Heydər Eminov olması müəyyənləşib.
Əlahiddə Çevik Polis Alayı və Abşeron Rayon Polis İdarəsi əməkdaşlarının keçirdikləri birgə əməliyyat tədbirləri nəticəsində isə Nəsimi rayonundan Yevlax rayon sakini Ramil Salmanova məxsus “VAZ-2101” markalı avtomobili oğurlamaqda şübhəli bilinən Yunis İmanov saxlanılaraq nəqliyyat vasitəsi ilə birgə Nəsimi Rayon Polis İdarəsinə təhvil verilib.
Davam etdirilən əməliyyat tədbirləri nəticəsində avtomobili qaçırmaqda şübhəli bilinən qrupun digər üzvləri də saxlanılıblar. Araşdırmalarla onların Xırdalan şəhər sakini Kənan Quliyev, Gəncə şəhər sakinləri Nəsrəddin Həsənov və İntiqam Rzayev olmaları müəyyənləşdirilib.
Faktlarla bağlı araşdırmalar aparılır.
2457
2457
