Gəncə Avtomobil Zavodu “Aqrolizinq” üçün 1000 traktor,700 qoşqu istehsal edəcək

“Aqrolizinq” Açıq Səhmdar Cəmiyyətinə (ASC) müqavilə əsasında təhvil verilən Gəncə Avtomobil Zavodu İstehsalat Birliyində istehsal olunan, pambıqçılıqda istifadə edilən “MTZ 80 X” markalı 150 ədəd və “1221” markalı 120 ədəd traktorlara baxış keçirilib.

YeniAvropa xəbər verir  ki, Kənd Təsərrüfatı Nazirliyinin “Aqrolizinq” ASC-nin Gəncə rayonlararası təchizat bazasında keçirilən tədbirdə kənd təsərrüfatı nazirinin müavini Seyfəddin Talıbov, “Aqrolizinq” ASC-nin, Gəncə Avtomobil Zavodunun və Maşın Sınaq Stansiyasının nümayəndələri iştirak ediblər.

Texnikalara baxışda “Aqrolizinq” ASC-nin İdarə Heyətinin sədri Elşən Məmmədov və Gəncə Avtomobil Zavodu İstehsalat Birliyinin direktoru Kamran Nəzərov da iştirak ediblər. Söhbət zamanı ikitərəfli əməkdaşlıq, texnikaların təkmilləşdirilməsi, yeni modellərin yığılması və görüləcək işlər barədə məsələlər müzakirə olunub. Gəncə Avtomobil Zavodu İB-nin direktoru Kamran Nəzərov diqqətə çatdırıb ki, 2007-ci ildən etibarən dövlət sifarişi əsasında müxtəlif modeldə traktorlar və kənd təsərrüfatı texnikaları, asma avadanlıqlar, traktor qoşquları yığılaraq “Aqrolizinq” ASC-yə təhvil verilib. “Bu günədək Gəncə Avtomobil Zavodu İB- də 10 min ədəd müxtəlif markalı traktor yığılıb, onlardan 8466-sı dövlət sifarişi əsasında “Aqrolizinq” ASC-yə verilib. Bu il “Aqrolizinq” ASC ilə yeni müqavilə imzalamışıq və 1000 traktor və 700 traktor qoşqusu istehsal edərək təhvil verəcəyik. Müəssisəmizdə istehsal olunan kənd təsərrüfatı texnikalarının keyfiyyətinə nəzarət etmək məqsədilə “Aqrolizinq” ASC-nin və Gəncə Avtomobil Zavodu İB-nin mütəxəssislərindən ibarət qrup yaradılıb. Çalışırıq ki, fermerlər və iş adamları müəssisəmizdə istehsal olunan texnikaların keyfiyyətindən məmnun qalsınlar”, - deyə Kamran Nəzərov əlavə edib.