Avropa diaspor təşkilatları sədrləri Bakıda birləşmə qərarını açıqladılar

Bu gün Bakıda, Beynəlxalq Mətbuat Mərkəzində bir araya gələn  Avropadakı böyük və nüfuzlu diaspor təşkilatlarımızdan olan Dünya Azərbaycanlıları Milli  Birliyinin sədri Cavad Deraxti və  Dünya Azərbaycanlıları Assambleyasının sədri Rəşad Quliyev Azərbaycanın inkişafı , onun mövqelərinin xaricdə daha da dəstəklənməsi və lobbiçiliyin daha da güclənməsi naminə qüvvələrini birləşdirmək qərarına gəldiklərini KİV-ə bəyan etdilər.

YeniAvropa xəbər verir ki, tədbirdə  tanınmış diaspor hərəkatı nümayəndələri,  ictimai fəallar, KİV nümayəndələri iştirak ediblər. 

Tədbir iştirakçıları öncə Aprel döyüşlərində, eləcə də Azərbaycanım ərazi bötövlüyü uğrunda canlarından keçən vətən övladlarımızın xatirəsini bir dəqiqəlik sükutla yad ediblər.Sonra azərbaycanın dövlət himni səsləndirilib..

Mərkəzi İsveçin Malmö şəhərində yerləşən Dünya Azərbaycanlıları Milli  Birliyinin (WANU)  sədri Cavad Deraxti çıxış edərək bildirdi ki, iki nüfuzlu diaspor təşkilatının birləşmək haqda qərar verməsi heç də digər diaspor təşkilatlarımıza qarşı yönəlməyib. Əksinə,  diaspor təşkilatlarımızın fəaliyyətinin gücləndirilməsi məqsədi daşıyır.

Qeyd edilib ki, Bakıya gəlməzdən əvvəl birlik qərarı barədə Almaniya, Rusiya, Gürcüstan və bir sıra digər ölkələrdəki Azərbaycanın diaspor təşkilatlarının rəhbərliyi ilə müzakirələr aparılıb. İlkin rəylər də bəllidir: 15-dək diaspor təşkilatları bu birlik qərarırnı alqışlayıb və ona dəstək verməyə hazır olduqlarını bəyan ediblər.  

Cavad Deraxti qeyd edib ki, hazırda xaricdə fəaliyyət göstərən diaspor təşkilatları iki cəbhəyə bölünüb.Bir qisim diaspor təşkilatları Azərbaycan hakimiyyətinə qarşı qatı müxalif mövqedə dayanıb, digərləri isə hakimiyyətyönlü fəaliyyəti ilə fərqlənir. “Bizim məqsədimi isə odur ki, siyasi əqidəsindən asılı olmayaraq hər bir diaspor təşkilatını və fəalını Azərbaycan naminə bir araya gətirmək, Vətənimizin haqlı mövqeyini beynəlxalq arenada müdafiə etmək, onun haqq səsini dünyaya eşitdirmək və çatdırmaq, erməni lobbiçiliyinə qarşı qətiyyətli mübarizə aparmaq, eləcə də  Azərbaycanın bütövlüyü uğrunda mücadilə etməkdir”,-deyə diaspor rəhbəri vurğulayıb.  

Cavad Deraxti çıxışında bildirib ki, diaspor təşkilatlarının gələcəkdə birləşmədən sonar necə adladırılmasını hələlik qərarlaşdırmayıblar. “Hələlik müxtəlif adlar və birləşmə formaları haqda təkliflər daxil olmaqdadır. Bütün bu məsələlərə bu ilin sentyabrında keçirilməsi nəzərdə tutulan Birlik qurultayında qərar veriləcək”,-deyən natiq  qurultayın dəqiq keçirilmə vaxtı və yeri haqda mətbuatda əlavə məlumatların veriləcəyini vurğulayıb.   

Mərkəzi Almaniyanın Köln şəhərində yerləşən Dünya Azərbaycanlıları Assambleyasının sədri Rəşad Quliyev çıxışında  son illərdə  diaspor fəaliyyəti, Azərbaycanın haqq səsinin dünyaya çatdırılması , erməni diasporunun yalanlarının ifşa edilməsi , erməni əsirliyində olan soydaşlarımızın əsirlikdən azad edilməsi istiqamətində beynəlxalq təşkilatlarla gördükləri işlər barədə  qısa məlumat verib. Qeyd edib ki, Azərbaycanın diaspor təşkilatlarının bəziləri öz fəaliyyətlərini yalnız Azərbaycan hakimiyyətini tənqid etmək üzərində qurub ki, bud a düzgün fəaliyyət hesab edilə bilməz.” Ola bilsin ki, konkret məsələyə  müxtəlif diaspor təşkilatının, yaxud diaspor fəalının yanaşması müxtəlifdir. Lakin bu,bizim birləşməməyimizə  heç də əsas vermir.  Biz demirik ki Azərbaycanda dövlət məmurlarını, yaxıd hakimiyyətin fəaliyyətini tənqid etmək olmaz. Bunlar da lazımdır. Müxalifət olmayan yerdə inkişaf da mümkün deyil.Kimsə tənqid etməlidir ki, hakimiyyət də həmin tənqidə baxıb, nəticə çıxarmalı, öz fəaliyyətini korrektə etməlidir. Amma, bunların da bir üsulu, bir yolu vardır. Hər bir məsələyə yanaşmada konstruktivlik olmalıdır. Bizim bir məqsədimiz. bir yolumuz vardır.O da Azərbaycan dövlətçiliyi yoludur və biz bu yoldan heç bir zaman dönməyəcəyik. Azərbaycan dövlətçiliyinə qarşı yönəldilən təhdidlərə qarşı əzmlə mübarizə aparacağıq”,-deyə Rəşad Quliyev vurğulayıb.

 Sonra diaspor rəhbərləri KİV nümayəndələrinin suallarını cavablandırıblar.

Xatırladaq ki, diaspor təşkilatlarının rəhbərləri iki gün əvvəl Bakıya gəliblər. Səfər çərçivəsində  zərbaycan rəsmiləri və ictimai təşkilatların rəhbərləri ilə bir sıra görüşlər  keçirməyi planlaşdırıblar.