Bakıda 15 əcnəbi saxlanılıb

Dövlət Miqrasiya Xidməti (DMX) qanunsuz miqrasiyaya qarşı mübarizə tədbirlərini davam etdirir.

YeniAvropa DMX-nin saytına istinadla xəbər verir ki, Xidmətin qanunsuz miqrasiyaya qarşı keçirdiyi tədbirlər zamanı 14 nəfər Hindistan və 1 nəfər Banqladeş vətəndaşı olmaqla, ümumilikdə 15 əcnəbi saxlanılıb. Araşdırma zamanı Hindistan vətəndaşlarından altı nəfərin Azərbaycan ərazisində olma və yaşama qaydalarını pozduğu və səkkiz nəfərin ölkəyə gəlişinin bəyan edilmiş məqsədinə əməl etmədiyi məlum olub.

Saxlanılmış və ölkə ərazisində qanunsuz yaşayan Banqladeş vətəndaşı Abir Mirzanur Rahmanın müəyyən məbləğdə ödəniş qarşılığında saxta müvəqqəti yaşamaq üçün icazə vəsiqəsi əldə etməyə çalışdığı məlum olub. DMX tərəfindən Rusiya Federasiyasının azyaşlı vətəndaşının adına verilmiş vəsiqənin elektron nüsxəsi üzərində məlumatlar dəyişdirilərək A.M.Rahmanın adına saxtalaşdırılıb. Əcnəbi həmin vəsiqənin Azərbaycan Respublikası vətəndaşı Yusubov Tərlan Tofiq oğlu tərəfindən hazırlandığını bildirib.

Bundan əlavə, Azərbaycana işləmək adı altında aldadılaraq gətirilmiş və keçirilmiş tədbirlər zamanı saxlanılmış daha dörd nəfər Hindistan vətəndaşının sahibkarlıq fəaliyyəti adı altında pərdələndiyi, lakin heç bir sahibkarlıq fəaliyyəti ilə məşğul olmadıqları məlum olub. Bu şəxslərdən bəzilərinin Azərbaycana gətirilmələrini, burada yerləşdirilmələrini Azərbaycanda daimi yaşayan Pakistan İslam Respublikasının vətəndaşı Muhammad Nasirin təşkil etdiyi və onun müəyyən məbləğdə ödəniş qarşılığında həmin əcnəbiləri qanunsuz yollarla leqallaşdırmağa çalışdığı aşkarlanıb.

Göstərilən hər iki faktla bağlı müvafiq tədbirlər görülməsi üçün materiallar aidiyyəti orqanlara göndərilib.