4011
Son məlumata görə yanğında xəsarət alan pasiyentlərdən 3 nəfəri Toksikologiya Mərkəzinə aparılıb. Səhiyyə qaynaqları yanğında ölənlərin sayının çox ola biləcəyini bildirir, lakin hələlik ölənlərin sayına dair rəsmi məlumat verilmir. Hadisə zamanı yanğın baş verən korpusda 30-dan çox pasiyentin olduğu bildirilir.
YeniAvropa xəbər verir ki, hadisə yerinə baş nazirin müavini, narkotiklərə qarşı mübarizə üzrə Dövlət Komissiyasının sədri Əli Həsənov da gəlib. Rəsmilərdən hələlik hadisə barədə açıqlama verən yoxdur.
Xatırladaq ki, bu gün səhər saatlarında Bakının Xətai rayonunda Respublika Narkoloji Mərkəzinin binasında yanğın baş verib. Yanğın yerinə FHN-in Dövlət Yanğından Mühafizə Xidmətinin və Xüsusi Riskli Xilasetmə Xidmətinin müvafiq xilasetmə qüvvələri, eləcə də təcili tibbi yardım briqadaları cəlb olunub. Mərkəzin pasiyentlərinin evakuasiyası başlayıb.
Yanğın zamanı azı bir nəfərin öldüyü məlumdur. Hüquq-mühafizə orqanlarından bildirildiyinə görə meyiti aşkar edilən şəxsin Mərkəzdə müalicə alan xəstələrdən biridir, hazırda onun şəxsiyyətinin məlum olmadığı bildirilir. Ölənlərin sayının artma ehtimalı var.
Azərbaycan Baş Prokurorluğunun yüksək vəzifəli şəxsləri də hadisə yerinə cəlb olunublar.Hava küləkli olduğundan alovu söndürmək çətinləşib. Bu səbəbdən, FHN-in digər rayonlar üzrə yanğın mühafizə xidmətlərinin briqadaları da hadisə yerinə cəlb edilib.
Əlavə məlumat veriləcək.
