Sahibkarlar üçün iqtisadi islahatlar barədə seminarlar təşkil olunub

İqtisadi İslahatların Təhlili və Kommunikasiya Mərkəzində (İİTKM) sahibkarların ölkədə uğurla həyata keçirilən islahatlar barədə məlumatlandırılması üçün son bir həftə ərzində 10-dək seminar keçirilib.

Bu barədə YeniAvropa-ya  İİTKM-in PR meneceri Zənurə Talıbova məlumat verib. Qeyd edilib ki, seminarlarda vahid onlayn ixrac ərizəsi, gömrükdə yaşıl dəhliz, elektron məhkəmənin iqtisadi mühitin yaxşılaşdırılmasında töhfəsi, kredit büroları, daşınar əmlakın yüklülüyü, daşınmaz əmlakın qeydiyyatı, tikintiyə icazələrin alınması, elektrik şəbəkəsinə qoşulma və s. mövzularda müzakirələr təşkil olunub. Vergilər Nazirliyi, Dövlət Gömrük Komitəsi, İqtisadi İslahatların Təhlili və Kommunikasiya Mərkəzi, Maliyyə Bazarlarına Nəzarət Palatası, "Azexport.az" və digər dövlət qurumlarının nümayəndələri sahibkarlar qarşısında təqdimatlar edərək, aparılan islahatları izah ediblər. Seminarlarda yüzlərlə Azərbaycan sahibkarı iştirak edib və onların iqtisadi islahatlarla bağlı sualları cavablandırılıb. Tədbirlərdə bildirilib ki, Prezident İlham Əliyevin rəhbərliyi ilə aparılan iqtisadi islahatlar nəticəsində Azərbaycan hazırda Avropa və Mərkəzi Asiyada ən islahatçı ölkə kimi qiymətləndirilir. İqtisadi İslahatların Təhlili və Kommunikasiya Mərkəzi, həmçinin islahatların daha praktik izah edilməsi üçün sahibkarların müxtəlif dövlət qurumlarına məlumat turlarını təşkil edir.

Qeyd edək ki, İqtisadi İslahatların Təhlili və Kommunikasiya Mərkəzinin fəaliyyətinin məqsədi ölkənin dayanıqlı iqtisadi inkişafının təmin edilməsi istiqamətində makro və mikroiqtisadi səviyyədə təhlil və tədqiqatlar aparmaqla, analitik məlumatlar əsasında iqtisadi islahatların həyata keçirilməsi üçün təkliflər, habelə orta və uzunmüddətli dövr üçün proqnozlar hazırlamaqdan, dövlət orqanlarını və qurumlarını həmin proqnozlarla təmin etməkdən, həmçinin iqtisadiyyatın müxtəlif sahələrində Azərbaycan Respublikasının nailiyyətlərinin təbliğini təşkil etməkdən ibarətdir.