Ekoloji təmiz kənd təsərrüfatı məhsulları istehsal edən fermerlər maarifləndiriləcək

 “Ekoloq-2010” Ekoloji Maarifləndirmə  İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirilən “ Ekoloji təmiz kənd təsərrüfatı məhsullarının istehsalı ilə bağlı sahibkarlar arasında maarifləndirmə işlərinin aparılması “ layihəsinə  start verib.

Layihə rəhbəri  Səlim Balayev əməkdaşımızla söhbətində bildirib ki, layihə  bu gün dünya dövlətlərini narahat edən  əsas bir məsələ-ekolji təmiz kənd təsərrüfatı məhsullarının istehsalının genişləndirilməsinin  təbliğində ictimai rolun artırılmasından bəhs edir.Onun sözlərinə görə , araşdırmalar göstərir ki,  kənd təsərüfatı məhsullarının yetişdirilməsi zamanı istifadə olunan müxtəlif növ sintetik gübrələr, həşəratlara qarşı istifadə edilən zərərli maddələr, sonda qəbul etdiyimiz ərzaq məhsulları ilə bərabər insan orqanizminə daxil olur. Bütün bu zərərli maddələr illərlə orqanizmdə yığılaraq müxtəlif xəstəliklərə səbəb olur.Son illərdə geniş yayılmız müxtəlif onkoloji xəstəliklər, sonsuzluq, uşaqların qusurla dünyaya gəlməsi qəbul etdiyimiiz ərzaq məhsullarının keyfiyyətindən birbaşa asılıdır.  Odur ki, dünya dövlətləri ekoloji təmiz, insan orqanizmi üçün faydalı vitamin və minerallarla zəngin olan kənd təsərrüfatı məhsullarının istehsalını bir nömrəli vəzifə olaraq qarşıya məqsəd qoyurlar.

    Beynəlxalq Ekoloji Kənd Təsərrüfatı Hərəkatı Federasiyasının (IFOAM) məlumatına əsasən, hazırda  dünyanın 172 ölkəsində 2,3 milyon fermer 43,7 milyon hektar ərazidə ekoloji təmiz kənd təsərrüfatı məhsulları istehsalı ilə məşğul olmaqdadır. Bu siyahıda  sözsüz ki, Azərbaycan da  yer alır. Ərazisində ekoloji təmiz  torpaqların payına görə Azərbaycan aparıcı 10 ölkə sırasına  daxildir.  Əlverişli təbii iqlim qurşağında yerləşməsi, sutkanın  təqribən 10 saatının günəşli olması Azərbaycanda ekoloji təmiz kənd təsərrüfatı məhsullarının istehsalı üçün geniş şərait yaradır. Digər tərəfdən isə  bu istiqamətdə dövlətin marağı və dəstəyi də ortadadır. Belə ki, 2008-ci il 13 iyun tarixində “Ekoloji təmiz kənd təsərrüfatı haqqında” Azərbaycan Respublikasının Qanunu qəbul olunub, bunun ardınca  bir sıra normativ-hüquqi və informasiya-məlumat bazası formalaşdırılıb. Prezident İlham Əliyevin təşəbbüsü ilə “Made in Azerbaijan” brendinin dünyada tanıdılması məqsədilə ondan artıq ölkədə Azərbaycan Ticarət  Evi yaradılıb. Həmin Ticarət evlərində  daimi  sərgilər fəaliyyət göstərir ki, burada  da ölkəmizdə istehsal olunan 150 çeşiddən artıq ekoloji təmiz məhsullar sərgilənməkdədir.

   Təşkilat sədri qeyd edib ki, layihə respublikanın cənub bölgəsi olan Lənkəran, Lerik və Astara rayonlarında icra olunacaq. 3 ay müddətində həyata keçiriləcək layihə çərçivəsində görüləcək işlərə toxunan  S.Balayev qeyd edib ki, ilk mıərhələdə Lənkəran, Lerik və  Astara rayonlarında olan fermerlər və kiçik sahibkarlarla fərdi söhbətlər aparılacaq,daha sonra  Kənd Təsərrüfatı Nazirliyinin, Ekologiya və Təbii Sərvətlər Nazirliyinin, eləcə də yerli icra hakimiyyəti orqanları nümayəndələrinin  iştirakı ilə sözügedən rayonlarda  dəyirmi masalar təşkil olunacaq. Eyni zamanda layihə ərzində KİV-lərlə əməkdaşlıq ediləcək və çap olunan 1000 ədəd bukletlər fermerlər arasında pulsuz paylanacaq.