“Şimal-Cənub” Dəhlizi Koordinasiya Şurasının növbəti iclası Bakıda keçiriləcək

“Şimal-Cənub” Beynəlxalq Nəqliyyat Dəhlizinin Koordinasiya Şurasının növbəti iclasının Bakıda keçiriəcək. YeniAvropa xəbər verir  ki, bu barədə martın 4-də Tehranda  keçirilən “Şimal-Cənub” Beynəlxalq Nəqliyyat Dəhlizinin Koordinasiya Şurasının 7-ci iclasında qərara alınıb.

İclasda İran və Azərbaycanla yanaşı, Türkiyə, Hindistan, Tacikistan, Qazaxıstan, Bolqarıstan, Rusiya, Belarus və Omanın nümayəndələri iştirak ediblər.

İclasda çıxış edən İranın yollar və şəhərsalma naziri Məhəmməd İslami qeyd edib ki, “Şimal-Cənub” Beynəlxalq Nəqliyyat Dəhlizi iştirakçı dövlətlərlə yanaşı, bütün regionun iqtisadi inkişafına böyük təkan verəcək. Beynəlxalq əhəmiyyət daşıyan bu layihənin aktiv fəaliyyətə başlamasının nəticəsində Asiya ilə Avropa qitələri arasında nəqliyyat “körpüsü” yaranacaq.

Dəmir yollarının layihə çərçivəsində xüsusi əhəmiyyət daşıdığını vurğulayan nazir bildirib ki, artıq İran, Azərbaycan və Rusiyanın dəmir yolları sistemlərinin birləşməsinə çox az vaxt qalıb. Hər 3 ölkə yüklərin Asiyadan Avropaya tranzit daşınmasında mühüm rol oynayacaqlar.Qeyd olunub ki, hələlik dəhliz vasitəsilə ildə 17 milyon ton yük daşınır. Qəzvin-Rəşt-Astara (İran) – Astara (Azərbaycan) dəmir yolu xətti istifadəyə verildikdən sonra isə daşınan yüklərin həcmi 30 ildə 30 milyon tona yüksələcək.

İclasda ölkəmizi təmsil edən “Azərbaycan Dəmir Yolları” QSC-nin tarif şöbəsinin rəisi Elxan Əsədov deyib ki, Azərbaycan dəhlizin aktiv fəaliyyətə başlaması üçün lazımi işləri həyata keçirir. Azərbaycan İran ilə birgə Astarada yük terminalının tikintisini davam etdirir. Terminal 35 hektar ərazini əhatə edir və Azərbaycan bu terminalı 25 il, eləcə də 1,4 kilometrlik dəmir yolunu 15 il müddətinə icarəyə götürəcək: “Terminal 4 bölmədən ibarətdir. Burada ümumi yüklər, konteyner, taxıl, neft və neft məhsulları üçün bölmələr olacaq. Rəşt-Astara dəmir yolu xəttinin inşası başa çatdıqdan sonra Fars körfəzi ilə Skandinaviya ölkələri arasında nəqliyyat bağlılığı yaranacaq. Azərbaycan İranın Bəndər-Abbas limanından daxil olan yükləri Qara dəniz sahillərinə də çatdırmaq imkanına malikdir”.

Rusiya, Bolqarıstan, Türkiyə, Qazaxıstan, Belarus, Hindistanın nümayəndələri çıxış edərək ölkələrinin imkanlarını təqdim ediblər.

Sonra vahid tariflərin tətbiqi, gömrük rəsmiləşməsinin elektron sistemə keçirilməsi, rüsum və vergilərin optimallaşdırılması kimi məsələlər ətrafında müzakirələr aparılıb. Qərara alınıb ki, hər ölkənin təmsilçisindən ibarət işçi qrupu yaradılsın və meydana çıxan problemlər barəsində təkliflər hazırlayıb Koordinasiya Şurasına təqdim etsin. İclasın yekunu olaraq Protokol imzalanıb.