İrandan Azərbaycana narkotik maddə gətirən şəxs saxlanılıb

Fevralın 20-də saat 20:38 radələrində Dövlət Sərhəd Xidmətinin(DSX) Sərhəd Qoşunlarının “Göytəpə” sərhəd dəstəsinin xidməti ərazisində Cəlilabad rayonunun Zəhmətabad kəndi yaxınlığındakı sərhəd zastavasının xidməti sahəsində işarəverici qurğudan dövlət sərhədinin pozulması barədə siqnal daxil olub. Sərhəd zastavası dərhal “silaha” komandası ilə qaldırılaraq həmin sahə istiqamətində hərəkət edib və İran İslam Respublikasından Azərbaycan Respublikasına doğru 1 nəfərə məxsus izlər aşkarlanıb.

DSX-nin mətbuat mərkəzindən  YeniAvropa-ya bildiriblər ki, dövlət sərhədinin pozulması ilə əlaqədar Daxili İşlər Nazirliyinin və Dövlət Təhlükəsizliyi Xidmətinin Cəlilabad rayon şöbələrinin əməkdaşları ilə birgə keçirilmiş kompleks əməliyyat-axtarış tədbirləri nəticəsində Cəlilabad rayon sakini 1970-ci il təvəllüdlü Mahmudov Tehranxan Nəhmət oğlu şübhəli şəxs qismində saxlanılıb. Aparılan təhqiqat-araşdırma tədbirləri nəticəsində dövlət sərhədini pozan şəxsin Cəlilabad rayonunun Uzuntəpə kənd sakini 1976-cı il təvəllüdlü Yaqubov Qasım İskəndər oğlu olması müəyyənləşdirilib. Araşdırma zamanı Q.Yaqubovun fevralın 18-də “Biləsuvar” SNM-dən rəsmi qaydada Azərbaycandan İrana getməsi, fevralın 20-də saat 20:38 radələrində isə dövlət sərhədini pozaraq İran İslam Respublikasından Azərbaycan Respublikasına keçməsi və özü ilə külli miqdarda narkotik vasitəni gətirməsi məlum olub. Q.Yaqubovun axtarışı təşkil edilib və nəticədə o, fevralın 21-də Cəlilabad rayonunun Uzuntəpə kəndində saxlanılıb.

Saxlanılan şəxsin iştirakı ilə Cəlilabad rayonunun Kövüzbulaq kəndi ərazisində yerləşən yaşayış olmayan həyətyanı sahədə gizlədilmiş ümumi çəkisi 6 kiloqram 365 qram olan (4 kiloqram 440 qram heroin, 1 kiloqram 925 qram həşiş) narkotik vasitə və 1 ədəd gecəgörmə cihazı aşkarlanaraq götürülüb.

Dövlət Təhlükəsizliyi Xidməti və Daxili İşlər Nazirliyi ilə birgə əməliyyat-axtarış tədbirləri nəticəsində narkotik vasitənin sifarişçisi Cəlilabad rayon sakini 1972-ci il təvəllüdlü Hümbətov Nəsib Həmdulla oğlu müəyyənləşdirilərək saxlanılıb.

Qeyd olunan fakt üzrə əməliyyat-istintaq tədbirləri davam etdirilir.