Qazaxıstan Senatı Qazaxıstan-Türkmənistan dövlət sərhədinin delimitasiyası və Xəzər dənizində balıqçılıq zonalarının bitişik hissələrinin delimitasiyası ilə bağlı Türkmənistanla sazişin ratifikasiyası haqqında qanunu qəbul edib.
YeniAvropa xəbər verir ki, bu barədə “TASS” agentliyi məlumat yayıb.
Qeyd olunub ki, Qazaxıstan və Türkmənistan arasında saziş 2021-ci ilin oktyabrında Aşqabadda imzalanıb. Onun məqsədi Qazaxıstan və Türkmənistan arasında Xəzər dənizi ilə dövlət sərhədinin xəttini, onların ərazi sularını və balıqçılıq zonalarının ona bitişik hissələrini müəyyən etməkdir.
Senatın Xarici Əlaqələr, Müdafiə və Təhlükəsizlik Komitəsinin bəyanatında deyilir ki, bu sazişlə tərəflər Xəzər dənizində iki ölkə arasında dövlət sərhədi xəttinin kursunu, onların ərazi sularının delimitasiyasını və balıqçılıq zonalarının bitişik hissələrinin demarkasiya xəttini müəyyən ediblər. Demarkasiya xətləri isə orta xətt prinsipi əsasında qurulur.
Bildirilib ki, sazişin ratifikasiyası yerin təkindən istifadə və su bioresurslarının ovlanması üzrə suveren hüquqların həyata keçirilməsi üçün əlverişli şərait yaradacaq, o cümlədən tərəflər arasında mehriban qonşuluq münasibətlərinin genişləndirilməsinə, Xəzər dənizinin əhəmiyyətinə, siyasi, iqtisadi, sosial və mədəni əlaqələrin təmin edilməsinə xidmət edəcək.
Saziş Qazaxıstanın cənubunda dövlət sərhədinin delimitasiyası prosesini başa çatdıracaq və tarixdə sahilyanı ölkələr arasında Xəzər dənizində dövlət sərhədlərini hüquqi cəhətdən müəyyən edən ilk sənəd olacaq.
2212
2212
