SOCAR istiqrazları bahalaşıb

Azərbaycanın qiymətli kağızlar bazarında SOCAR istiqrazlarına tələbat kəskin artıb.

İstiqrazın market -meykeri olan “PSG Kapital” şirkətindənYeniAvropa-ya verilən məlumata görə, son günlər istiqrazların alışı üçün “PSG Kapital”ın “ASAN 1” və “ASAN 5” xidmət mərkəzlərindəki satış nöqtələrinə müraciətlər çoxalıb. Artım özünü həm müraciətlərin sayında, həm də sifariş edilən istiqrazların sayında göstərir.

SOCAR istiqrazlarına tələbatın artması istiqrazların satış göstəricilərində də əksini tapıb. Bu ilin əvvəlindən indiyədək istiqrazlarla əməliyyatların həcmi 10 milyon dolları keçib.

İstiqrazlara tələbatın artması özünü qiymətli kağızın qiymətində də göstərib. Bir neçə gün əvvəl təkrar bazarda SOCAR istiqrazlarının satış qiyməti artaraq 1006-1011 dollara yüksəlib. Amma hətta bu qiymətə də istiqraz almaq istəyənlərin sayı böyükdür.

İstiqrazlara tələbatın yüksəlməsinin digər səbəbi, əhalinin bu kağızın üstünlükləri barədə məlumatının artmasıdır. Yüksək gəlir, dərhal pula dəyişmək və hissə-hissə satmaq imkanı SOCAR istiqrazlarını müştərilər üçün xüsusilə cəlbedici edir.

Xatırladaq ki, ölkədə ən çox alınıb-satılan qiymətli kağız olan SOCAR istiqrazları 2016-cı ilin oktyabrında dövriyyəyə buraxılıb. Nominal qiyməti 1000 ABŞ dolları olan istiqrazların illik gəlirliliyi 5 faiz və ya hər istiqraza görə ildə 50 dollardır. İstiqrazlar üzrə faizlər 3 aydan bir olmaqla, ildə 4 dəfə ödənilir.

İndiyədək SOCAR istiqrazları üzrə 5 dəfə faiz ödənişi (4 ödəniş 2017-ci ildə, 1 ödəniş 2018-ci ildə) edilib. İstiqraz sahibləri indiyədək bu qiymətli kağızlardan 6,25 milyon dollar gəlir götürüblər. İstiqrazlar üzrə növbəti faiz ödənişi apreldə həyata keçiriləcək.