Azərbaycanda Aİ ölkələrindən 1400-dən çox şirkət fəaliyyət göstərir

Azərbaycanda Avropa İttifaqı ölkələrinin 1400-dən çox şirkəti fəaliyyət göstərir.İqtisadiyyat Nazirliyinin mətbuat xidmətindən YeniAvropa-ya verilən məlumatda qeyd olunub ki, bu barədə iqtisadiyyat naziri Şahin Mustafayev Avropa Komissiyasının nəqliyyat və mobillik üzrə baş direktoru Henrik Hololeyin başçılıq etdiyi nümayəndə heyəti ilə görüşündə deyib.

Nazir Şahin Mustafayev Azərbaycan Respublikası prezidentinin son 10 ildə Avropa İttifaqı ölkələrinə 6 rəsmi səfər etdiyini, Azərbaycan-Avropa İttifaqı əlaqələrinin genişləndirilməsində yüksək səviyyəli qarşılıqlı səfərlərin və keçirilən görüşlərin mühüm əhəmiyyətini vurğulayıb. Qeyd edilib ki, Azərbaycan və Aİ arasında Tərəfdaşlıq və Əməkdaşlıq, Şərq Tərəfdaşlığı Təşəbbüsü, Viza və Readmissiya haqqında sazişlər imzalanıb, Avropa Qonşuluq Siyasəti çərçivəsində Fəaliyyət Planı təsdiq edilib. Avropa İttifaqı Azərbaycanın əsas ticarət tərəfdaşlarındandır. 2017-ci ilin 11 ayında Azərbaycanın xarici ticarətində Avropa İttifaqı ölkələrinin payı 41 faiz təşkil edib. Avropa İttifaqı ölkələri tərəfindən 2012-ci ildən Azərbaycana təqribən 15 milyard ABŞ dolları həcmində investisiya yatırılıb. Azərbaycanda Avropa İttifaqı ölkələrinin 1400-dən çox şirkəti fəaliyyət göstərir.

Avropa İttifaqının 24 üzv ölkəsi ilə Azərbaycan arasında ikiqat vergitutmanın aradan qaldırılması, 17-si ilə sərmayələrin təşviqi və qarşılıqlı qorunması haqqında sazişlər, 9 üzv ölkə ilə Strateji Tərəfdaşlıq Bəyannaməsi imzalanıb, 16 üzv dövlətlə Hökumətlərarası Komissiya və İşçi Qrupu fəaliyyət göstərir. 2012-ci ildən indiyədək Avropa İttifaqı ilə 120-dən artıq tədbir, biznes-forum keçirilib. Nazir Şahin Mustafayev qeyd edib ki, Azərbaycan və Avropa İttifaqı enerji sahəsində uğurlu əməkdaşlıq edir və bu istiqamətdə Cənub Qaz Dəhlizi layihəsi xüsusilə önəmlidir. Azərbaycanın nəqliyyat infrastrukturunun yaxşılaşdırılması, ölkəmizin tranzit potensialı, Şimal-Cənub, Şərq-Qərb nəqliyyat dəhlizləri, Bakı Beynəlxalq Dəniz Ticarət Limanı, Bakı-Tbilisi-Qars dəmir yolu layihələri barədə məlumat verən iqtisadiyyat naziri ölkəmizin Aİ ilə nəqliyyat sahəsində əlaqələrinin genişləndirilməsində və bu istiqamətdə əməkdaşlığı enerji sahəsindəki əməkdaşlıq səviyyəsinə çatdırmaqda maraqlı olduğunu diqqətə çatdırıb.

Bildirilib ki, 2018-ci il fevralın əvvəlində Azərbaycan nümayəndə heyəti Çinə səfər edəcək və səfər zamanı ölkəmizin tranzit imkanlarına dair təqdimat keçiriləcək. Bundan başqa, bu ilin martında Brüsseldə Avropa İttifaqı ilə keçiriləcək görüşlərdə Avropa Komissiyasının Avropa Qonşuluq Siyasəti və Genişlənmə Danışıqları üzrə Komissarı ilə 2017-ci ildə Bakıda keçirilmiş görüşün nəticəsi olaraq müzakirələr davam etdiriləcək, Avropa İttifaqına üzv ölkələrin investisiyalarının Azərbaycana cəlb edilməsi və Azərbaycan məhsullarının güzəştli şərtlərlə Avropa bazarlarına daxil olması, nəqliyyat və yükdaşıma sahəsində əməkdaşlığın genişləndirilməsi məsələləri müzakirə ediləcək, beynəlxalq nəqliyyat layihələri təşviq olunacaq.

Avropa Komissiyasının nəqliyyat və mobillik üzrə baş direktoru Henrik Hololey ölkəmizə səfər zamanı Prezident İlham Əliyevin Avropa Komissiyası nümayəndə heyətini qəbul etdiyini məmnunluqla vurğulayıb, bir sıra görüşlər keçirildiyini diqqətə çatdırıb. Henrik Hololey 2011-ci ildəki səfərindən ötən müddət ərzində Azərbaycanın sürətlə inkişaf etdiyini, həyata keçirilən tədbirlərin qlobal çağırışlara tam cavab verdiyini qeyd edib. Bildirib ki, artıq Azərbaycan Avropa İttifaqı ilə enerji sektoru ilə yanaşı, nəqliyyat sahəsində də uğurla əməkdaşlıq edir və bu sahədə təqdimatların keçirilməsi Azərbaycanın tranzit potensialının təşviqi, əlaqələrin inkişafı baxımından əhəmiyyətlidir.

Görüşdə, həmçinin Avropa İttifaqı-Azərbaycan Sazişi layihəsi və digər məsələlər barədə fikir mübadiləsi aparılıb.