Astarada logistik mərkəz yaradılacaq

Azərbaycan “Şimal-Cənub” beynəlxalq nəqliyyat dəhlizi layihəsinin reallaşmasında fəal iştirak edir. Astara rayonunun ərazisindən keçən beynəlxalq nəqliyyat dəhlizi Avropa ölkələrinin, Rusiyanın, Orta Asiya və Qafqaz regionlarının körfəz ölkələri və Hindistana çıxışına, Xəzəryanı ölkələrin Qara dəniz limanları ilə ticarət əlaqələrinin intensivləşməsinə şərait yaradacaq. Eyni zamanda, Avropa-Cənubi Asiya-Yaxın Şərq arasında dəmir yolu daşımalarını, müvafiq olaraq dəmir yolunun istər yerli, istərsə də tranzit daşımalarından əldə etdiyi gəlirləri artırmağa imkan verəcək.YeniAvropa xəbər verir  ki,  bu fikirlər Astara rayon İcra Hakimiyyəti başçısının şəhər inzibati ərazi dairəsi üzrə nümayəndəliyinin 2017-ci ilin yekunlarına həsr edilmiş hesabat yığıncağına səsləndirilib. Yığıncaqda şəhər ərazi icra nümayəndəsi Şahverən Cavadovun məruzəsi dinlənilib.

Hesabat yığıncağında çıxış edən Astara rayon icra hakimiyyətinin başçısı Qəzənfər Ağayev bildirib ki, Azərbaycanın artıq beynəlxalq nəqliyyat mərkəzlərindən birinə çevril. Ölkəmizin “Şimal-Cənub” nəqliyyat dəhlizinin icrası istiqamətində öhdəsinə düşən bütün işləri uğurla yerinə yetirilib.Astara rayonunun ərazisindən keçən beynəlxalq nəqliyyat dəhlizi ilə bağlı Azərbaycandan İrana yeni dəmir yolunun çəkilməsi ilə əlaqədar dəmir yolunun Xəzər dənizi sahili boyu xəttinin başqa əraziyə köçürüləcəyini vurğulayan icra hakimiyyətinin başçısı Astarada logistik mərkəzin, dəmir yolunun keçdiyi ərazidə isə böyük ticarət obyektlərinin tikiləcəyini bildirib.

Yığıncaqda qeyd olunub ki, Ələt-Astara beynəlxalq avtomobil yolunun başa çatdırılması ilə Astaradan Bakıya olan məsafə 40 kilometr qısalacaq. Lənkəran Beynəlxalq Hava Limanından Astaraya bir saata qədər vaxt sərf olunduğu halda, yeni avtomobil yolu ilə 15 dəqiqəyə gəlmək imkanı yaranacaq. Bütün bunlar isə böyük turizm imkanlarına malik Astaraya xarici turistlərin axınına səbəb olacaq.