Yaponiya Rusiya ilə Kuril adaları məsələsinə 2019-cu ildə qayıtmağı planlaşdırır

Yaponiya hökuməti güman edir ki, Kuril adaları məsələsini Rusiya Prezidenti Vladimir Putinlə həll etmək daha asan ola bilər və buna görə də onu 2019-cu ildə Tokioda keçiriləcək G20 sammitində gözləyir. Bununla yanaşı, məsələnin həlli üçün ikitərəfli məsləhətləşmələr də davam etdiriləcək. YeniAvropa xəbər verir ki, bu barədə "Kyodo" agentliyi hökumətdəki mənbələrə istinadla məlumat yayıb.

Məlumatda qeyd edilir ki, Yaponiya hökuməti V.Putini yalnız G20 sammitində deyil, eyni zamanda, 2019-cu ilin mayına planlaşdırılan ikitərəfli danışıqlarda iştirak üçün onun Tokioya səfəri zamanı da gözləyir. Nazirlər Kabinetindəki mənbənin bildirdiyinə görə, Yaponiya Kuril adaları məsələsini V.Putinin hakimiyyətdə olduğu və ölkə daxilində sabitliyin hökm sürdüyü dövrdə həll etmək istəyir.

Xatırladaq ki, cari il martın 18-də Rusiyada növbəti Prezident seçkiləri keçiriləcək. Buna görə də yaponların kimi dəvət edəcəyi barədə fikir yürütmək hələ tezdir. Rusiya dövlət başçısının inaqurasiya mərasimi isə cari ilin mayında keçiriləcək.

Kyodonun məlumatında qeyd edilir ki, dəvət təklifini Baş nazir Şinzo Abe cari ildə Rusiyaya planlaşdırılan səfəri zamanı çatdıra bilər. Mənbənin bildirdiyinə görə, hökumətin başçısı ikitərəfli müzakirələri cari ilin sentyabrında Vladivostokda keçiriləcək Şərqi İqtisadi Forum zamanı da davam etdirməyi düşünür.

Bununla yanaşı, Ş.Abenin Rusiya Prezidentinin dəvətinə əsasən 2018-ci ildə Peterburq Beynəlxalq İqtisadi Forumunu ziyarət edəcəyi də bildirilir. Bundan əlavə, iki ölkənin liderləri cari ilin mayında görüşərək Rusiya və Yaponiya çarpaz ilinə birlikdə start verməyi də planlaşdırırlar.

Xatırladaq ki, V.Putin ilə Ş.Abenin son görüşü ötən ilin noyabrında Vyetnamın Dananq şəhərində keçirilən Asiya-Sakit okean İqtisadi Əməkdaşlığı sammitində baş tutub.