Şahzadə Harrinin 43 milyon dollarlıq toyu

Mayın 19-da Londonda , Vindzor şəhərciyində şahzadə Harri və Meqan Marklın toy mərasimi keçirilib. YeniAvropa "TASS" informasiya agentliyinə istinadla xəbər verir ki, əsas bayram tədbirlərinin məkanı Britaniya monarxlarının şəhərkənarı iqamətgahı – Vindzor qəsrində baş tutub. Bu binalar kompleksinin şərəfinə 1917-ci ildən bəri Böyük Britaniyanın bütün kral ailəsi Vindzorlar soyadını daşıyır.

Böyük Britaniyanın baş naziri Tereza Mey şahzadə Harri və amerikalı aktrisa Meqan Markla toy günü ünvanlandığı müraciətində onlara ən xoş arzularını çatdırıb. Britaniya hökumətinin başçısı bəy və gəlinə müraciətini bu gün özünün “Twitter” səhifəsində yerləşdirib. “Şahzadə Harri və Meqan Marklın toy gününə ən xoş arzularla. El şənliyinə, xalq gəzintisinə və digər tədbirlərə qoşulan hər kəsə xoş gün arzulayıram”, - deyə kansler yazıb.

Yerli telekanallar toy mərasiminin birbaşa yayımla veriblər.

Britaniya KİV-lərinin hesablamalarına görə, gəlinin paltarı kral ailəsinə 350 min avroya, toy tortu isə 57 min avroya başa gəlib. Ümumilikdə isə mərasimə 32 milyon funt sterlinq (43 milyon dollar) xərclənib.

Gəlin toydan sonra Amerika vətəndaşlığını Britaniya vətəndaşlığına dəyişəcək.

Toya, həmçinin şahzadə Harrinin keçmiş rəfiqəsi Çelsi Deyvi də dəvət olunub. Gəlinin atası isə mərasimdə iştirak etməyib.

Qeyd edək ki, Meqan Markl Britaniya şahzadəsinə ərə gedən ilk aktrisa, ilk amerikalı və ilk mulatdır. Toydan sonra gənc cütlük Sasseks hersoqu və hersoginyası titulunu alacaq, lakin Meqan Markl şahzadə olmayacaq. Şahzadə Harri atasından, qardaşından və üç yaxın qohumundan sonra Britaniya taxtına altıncı namizəddir. Amerikalı aktrisa Meqan Markl Kanadanın çoxseriyalı “Fors-majorlar” filmindəki roluna görə məşhurlaşıb. Bu, onun ilk nikahı deyil. Meqan kanadalı kinoprodüseri Trevor Engelsonla 2 il evli olub.

İnsan axınının çoxluğu səbəbindən Vindzor istiqamətində əlavə qatarlar və avtobuslar buraxılıb. Kral ailəsinin bir çox pərəstişkarı mərasimdən bir neçə gün öncə ilk cərgələrdə yerlərini tutub və küçədə gecələməli olublar. Ümumilikdə isə bu günlərdə şəhərə 100 min qonağın gələcəyi gözlənilir.