Bakıda növbəti ümumşəhər iməciliyi keçirilir

11:11 22-07-2023 | 1932

İyulun 22-də paytaxt Bakıda təmizlik və abadlıqla bağlı növbəti ümumşəhər daxili iməciliyi keçirilir.

YeniAvropa xəbər verir ki, Bakı şəhər İcra Hakimiyyətinin əməkdaşlarının iştirakı ilə səhər saatlarından başlanan iməcilik paytaxtın bütün rayonlarını əhatə edib. İməcilik zamanı paytaxtın kommunal xidmətləri tərəfindən şəhərdə prospekt və küçələrin, səki kənarlarının və işıq dirəklərinin, yol kənarındakı məhəccərlərin, bir sıra binaların fasadlarının, park və istirahət yerlərində oturacaqların təbiətə ziyanı olmayan vasitələrlə yuyulması həyata keçirilib.

Kommunal xidmətlərin texnikaları əsas küçə və prospektlərin yuyulmasını aparıb. Əməkdaşlar tərəfindən balansda olan yaşayış binalarında, həyət və yaşayış məhəllələrində, məişət tullantılarının atıldığı konteyner meydançalarının ətrafında əlavə təmizlik işləri görülüb.

Bakı şəhər Yaşıllaşdırma Təsərrüfatı Birliyinin əməkdaşları əsas magistral yol və prospektlərin kənarlarındakı ağacların dibini yumşaldıb, həmişəyaşıl ağacları yuyublar. Eyni zamanda, şəhər ərazisində Abşeronun iqliminə uyğun əkilən yeni ağac, kol və güllərə, yaşıllıq zolaqları və parklarda qazon örtüyünə qulluq göstərilib. İməcilikdə həm də prospekt və küçələr boyunca yerləşən ictimai iaşə, ticarət və digər obyektlərin vitrinləri, köşklər və avtobus dayanacaqları yuyulub, ətrafı təmizlənib. Təmizlik işlərində obyektlərin əməkdaşları da fəallıq göstəriblər.