Paytaxtın Sabunçu rayonunda “Azəriqaz” İstehsalat Birliyinin əməkdaşlarının döyülməsi ilə bağlı cinayət işi başlanıb.
YeniAvropa xəbər verir ki, bu barədə Baş Prokurorluğun mətbuat xidmətindən məlumat verilib.
Bildirilib ki, aprelin 19-da “Azəriqaz” İstehsalat Birliyinin əməkdaşlarının ərazidə xidmət etdiyi zaman qaz xəttinin yerinin dəyişdirilməsi səbəbindən əməkdaşlardan biri - İlkin Əzizov ilə abonent arasında mübahisə yaranması və abonentin qohumu Elnur Əliyevin həyətdən çıxaraq yumruqla onun çənə nahiyəsindən zərbə endirməsi barədə müraciət əsasında Sabunçu rayon Polis İdarəsinin 12-ci polis şöbəsində araşdırma aparılıb.
Fakta görə Sabunçu rayon Polis İdarəsinin İstintaq şöbəsində Cinayət Məcəlləsinin 128-ci (qəsdən sağlamlığa yüngül zərər vurma) maddəsi ilə cinayət işi başlanıb.
Cinayət işinin nəticəsi barədə ictimaiyyətə ətraflı məlumat veriləcək.
2513
2513
