Hesablama Palatası “Azərsu”dakı korrupsiyanı ifşa etdi

20:32 07-02-2021 | 2324

Hesablama Palatası kəndlərdə əhalinin içməli su təchizatını yaxşılaşdırmaq üçün dövlət büdcəsinin hesabına qurulan modul tipli sutəmizləyici qurğularla bağlı araşdırma aparıb.

YeniAvropa xəbər verir ki, bu barədə iqtisadçı ekspert Rövşən Ağayev özünün "Facebook" hesabında məlumat verib. Onun sözlərinə görə, "Azərsu” ASC-nin yol verdiyi maliyyə nöqsanları araşdırmada əksini tapıb.

Rövşən Ağayev audit hesabatının bəzi tapıntılarını qeyd edib:

1. “Azərsu” ASC modul tipli qurğuları istismara qəbul edən zaman 17 ədəd və ya 186839,8 manat dəyərində avtomobil və motosikletlər şirkətə verilməmiş və Ekologiya Nazirliyinin istifadəsində qalmışdır. Nəticədə 2018-ci ildə “Azərsu” ASC-nin Regional Sukanal İdarələri tərəfindən modul tipli sutəmizləyici qurğulara xidməti, eləcə də istismar zamanı tələb olunan mal-materialların çatdırılmasını təmin etmək məqsədi ilə mal-material xərcələrindən 12 ədəd 382320,0 manat (ƏDV ilə) dəyərində "UAZ" avtomobilləri alınaraq istifadəyə vermişdir.

2. Prezident sərəncamına əsasən ölkənin 15 rayonun 100 yaşayış məntəqəsində modul tipli sutəmizləyici qurğuların quraşdırılması işlərinin həyata keçirilməsi nəzərdə tutulsa da, bəzi quraşdırma işlərinin dəyərinin cari bazar qiymətlərindən yüksək götürülməsi nəticəsində 15 rayonda cəmi 90 ədəd və ya sərəncamda qeyd edilmiş say həddindən 10 ədəd az olmaqla modul tipli sutəmizləyici qurğu quraşdırılmışdır.

3. Forma-2 aktlarının seçmə üsul əsasında sənədli araşdırılması ilə 9 obyektdə 988234,4 manat məbləğində quraşdırma işlərinin dəyərinin 192343,8 manat artırıldığı müəyyən edilmişdir.

4. Respublikanın 7 inzibati rayonunun cəmi 46 yaşayış məntəqəsini içməli su ilə təmin edən 39 modul tipli sutəmizləyici qurğuların 5091160,7 manat dəyərində quraşdırma işlərinin nəzarət-ölçü üsulu ilə yoxlanması zamanı 1523481,5 manat dəyərində nöqsan və çatışmazlıqların olduğu aşkar edilmişdir.

5. 28 mart 2017-ci ildə Antiinhisar Siyasəti və İstehlakçıların Hüquqlarının Müdafiəsi Dövlət Xidmətinə bir mənbədən satınalma metodundan istifadə etməklə 16000000,0 manat məbləğində birbaşa müqavilə bağlanması üçün icazə istənilmişdir. Xidmət 10.04.2017-ci il tarixli razılıq məktubu ilə müqavilənin bağlanmasına razılıq verilmişdir. Lakin sonradan müqavilədə razılıq məktubunda qeyd edilmiş şirkət deyil, başqa şirkət olmuş və o, icraçı kimi fəaliyyət göstərmişdir.

Rövşən Ağayev aşağıdakı qeydlərə xüsusi diqqət yetirir:

1-ci bəndə baxın, qurğulara xidmət etmək üçün nəqliyyat vasitələri alınır, sonra qurğulara xidmət üzrə səlahiyyət bir dövlət qurumundan digərinə keçəndə kimsə bu vasitələri özündə saxlamağa qərar verir. Yeni səlahiyyət alan qurum da gedir 10 minlərlə büdcə puluna yenilərini alır.

3-cü bəndə baxın, 20% qiymət şişirtməsindən söhbət gedir.

4-cü bəndə baxın, xərclənən vəsaitlərin hər 3 manatından 1-də nöqsan tapılıb.