Atası Səlim Müslümovun həbs xəbərini təkzib etdi

Sabiq əmək və əhalinin sosial müdafiə naziri Səlim Müslümovun atası Yanvar Müslümov oğlunun həbs edilməsi ilə bağlı yayılan xəbərlərə reaksiya verib.

 YeniAvropa xəbər verir ki,  Yanvar Müslümov "Trend"ə açıqlamasında yayılan məlumatları təkzib edib.

O bildirib ki, sabiq nazirin həbs edilməsi barədə yayılan məlumatlar həqiqəti əks etdirmir: “Saytlar yazıblar ki, guya Səlim Müslümov həbs olunub. Vallah yalan söhbətdi, həbs edilməyib. Bu məlumatı kim yayıbsa bilmirəm. Səhər oğlumla özüm danışmışam, hər şey yaxşıdır”.

Xatırladaq ki, bu gün sosial şəbəkələrdə sabiq əmək və əhalinin sosial müdafiəsi naziri Səlim Müslümovun saxlanılması ilə bağlı xəbər yayılıb.

Yayılan məlumatlarda DTX keçmiş məmuru ciddi korrupsiya faktları üzrə saxladığı bildirilib. 

Qeyd edilib ki, onun nazir olduğu dövrdə nazirliyin tabeliyində olan Dövlət Sosial Müdafiə Fondundan  2 milyard manatdan çox dövlət vəsaiti yoxa çıxıb.

Bundan başqa Müslümovlara məxsus digər şirkətlərin siyahısı açıqlanıb:

"1.”ORİON GLOBAL” MƏHDUD MƏSULİYYƏTLİ CƏMİYYƏTİ əsasən xidmət sahəsini əhatə edir. Dəbdəbəli ORİON PALACE Səlim Müslümovun biznesində əhəmiyyətli yer tutur və bu şirkət üzərindən idarə olunur.
2.”ORİON CONSTRUCTİON” MƏHDUD MƏSULİYYƏTLİ CƏMİYYƏTİ tikinti sahəsində fəaliyyət göstərir.
3.”ORİON CARS” MƏHDUD MƏSULİYYƏTLİ CƏMİYYƏTİ şəhərin müxtəlif səmtlərində bahalı və VİP salonlu avtomobillərin icarəsi ilə məşğuldur.
4.”ORİON CREATİVE SOLUTİONS” MƏHDUD MƏSULİYYƏTLİ CƏMİYYƏTİ əvvəlcə Turqay Müslümlünün adına qeydiyyatdan keçirilsə də, sonradan Səlim Müslümovun digər oğlu – Asim Müslümlü Səlim oğlunun adına rəsmiləşdirilib.
 

Ağsuda Səlim Müslümovun 60 hektar, bacanağı Ənvər Seyidəliyevin isə 20 hektar sarımsaq sahəsi var. Səlim Müslümovun şəxsən özünün Pirhəsənli kəndindəki villası var.

Həmçinin Səlim Müslümovun oğlu Turqay Müslümlü Edinburq Universitetini bitirdikdən sonra biznes fəaliyyətinə başlayıb.

Onun adına 2017-ci ilin noyabrın 23-də o, Vergilər Nazirliyinin Bakı Şəhəri Lokal Gəlirlər Baş İdarəsində 4 şirkət qeydiyyatdan keçirib. Şirkətlər Turqay Müslümovun yaşadığı ünvanda – Binəqədi rayonu, Ziya Bünyadov, ev 7A-da hüquqi qeydiyyata alınıb.