Badamdarda baş verən sürüşmədə  texnogen amillərin də rolu olub

Yanvarın 28-i axşam saatlarında Badamdar- "20-ci sahə" avtomobil yolunun sağ kənarında sürüşmə hadisəsi baş verib. Prosesin baş verməsinin səbəbi əsasən təbii amillərin təsiridir. Belə ki, sərt və maili yamacın olması, ərazinin geoloji quruluşunda iştirak edən süxurların fiziki-mexaniki xüsusiyyətləri və son aylar əraziyə düşən intensiv atmosfer yağıntıları sürüşməyə meyilli olan ərazidə prosesin aktivləşməsinə səbəb olub. Ərazidə sürüşmənin baş verməsində təbii amillərlə bərabər texnogen faktorların da rolu qaçılmaz olub. Belə ki, yamacın yuxarı hissəsində fərdi yaşayış evlərindən təsərrüfat sularının axıdılması prosesin dinamikasına öz təsirini göstərib. Hazırda əməkdaşlar tərəfindən proses öyrənilir. Sürüşmənin parametrləri, dərinlik ölçüləri, başvermə səbəbləri aydınlaşdırılır.

YeniAvropa xəbər verir ki, bunu Milli Geoloji Kəşfiyyat Xidmətinin mütəxəssisi Rafiq Həsənov deyib.

O, bildirib ki, həmin ərazi Abşeron yarımadasında təhlükəli sürüşmə sahələri albomuna aid edilib.

"Bura sürüşməyə meyilli sahədir. Təbii proses gedir. Süxurların xarakteri elədir ki, müəyyən təsir və dinamika sürüşmənin əmələ gəlməsinə səbəb olur. Bu, qaçılmazdır. Atmosfer yağıntıları, maili yamac, süxurların fiziki-mexaniki xüsusiyyətləri prosesin yaranmasına zəmin yaradır. Burada təkrar sürüşmə ola da bilər.

Respublika ərazisində, o cümlədən Bakıda və Abşeron yarımadasında müəyyən aktiv sürüşmə sahələri var ki, həmin ərazilərdə payız-qış aylarında əsasən yağıntıların təsirindən sürüşmə prosesinin dinamikasında nisbi aktivlik qeydə alınır. Bakıda və Abşeron yarımadasındakı sürüşmə sahələrindən Zığda, Masazırda Zəli gölünün ərazisində, Nübar qəsəbəsində prosesin dinamikasında nisbi aktivlik müşahidə olunur",-deyə Rafiq Həsənov bildirib.