İndoneziyada zəlzələ qurbanlarının sayı 1234 nəfərə çatıb

12:47 02-10-2018 | 2877

İndoneziyada zəlzələ və sunami nəticəsində həlak olanların sayı 1234 nəfərə çatıb.

YeniAvropa xarici KİV-lərə istinadla xəbər verir ki, bu barədə İndoneziyanın təbii fəlakətlərin nəticələrinin aradan qaldırılması üzrə milli idarəsinin nümayəndəsi televiziyada çıxışı zamanı bildirib.

Xatırladaq ki, sentyabrın 28-də Mərkəzi Sulavesi əyalətində 7,4 bal gücündə zəlzələ və sonrakı iki sutka ərzində 170-ə yaxın yeraltı təkan baş verib. Zəlzələdən sonra İndoneziya sahilləri 3-5 metr hündürlüyündə sunaminin təsirinə məruz qalıb. Təbii fəlakətdən zərər çəkən bölgələrdə minlərlə ev dağılıb, 16 min nəfər öz evlərini tərk etmək məcburiyyətində qalıb. Ölənlərin sayının artacağı istisna olunmur.

İndoneziya Sakit okean odlu dairəsi adlandırılan güclü tektonik qırılma zonasının bir hissəsidir. Yer kürəsinin bu rayonunda ən aktiv tektonik plitələr yerləşir. Onlardan biri ildə səkkiz santimetr sürətlə irəliləyir. Seysmoloqlar hər il burada maqnitudası 4 baldan yuxarı olan 6-7 min zəlzələ qeydə alırlar.