Dekabrda Bakıda Azərbaycan-Böyük Britaniya Hökumətlərarası Komissiyanın iclası keçiriləcək

Azərbaycan Respublikası Hökuməti ilə Böyük Britaniya və Şimali İrlandiya Birləşmiş Krallığının Hökuməti arasında iqtisadi əməkdaşlıq üzrə Birgə Hökumətlərarası Komissiyanın həmsədrləri, energetika naziri Pərviz Şahbazov və Böyük Britaniyanın Dövlət Katibinin Parlament üzrə müavini, Biznes və Ticarət Departamentində ixracat naziri Malkolm Offordın iştirakı ilə onlayn görüş keçirilib.

Nazirlikdən YeniAvropa-ya bildirilib ki, görüşdə Birgə Hökumətlərarası Komissiyanın fəaliyyəti, o cümlədən 2023-cü ilin dekabrında Bakıda keçirilməsi planlaşdırılan növbəti iclası və ikitərəfli enerji əməkdaşlığı ilə bağlı məsələlər müzakirə edilib. Hökumətlərarası Komissiyanın Bakıda keçiriləcək 6-cı iclasının qarşılıqlı faydalı əməkdaşlığın inkişafına töhfə verəcəyi bildirilib. Həmçinin iki ölkə arasında “Tərəfdaşlıq və Əməkdaşlıq Sazişi” layihəsinin tezliklə yekunlaşdırılmasının vacibliyi qeyd edilib.

Söhbət zamanı bərpaolunan enerji sahəsinin inkişafı və enerji keçidi üzrə Azərbaycanın siyasəti ilə bağlı da fikir mübadiləsi aparılıb. Təbii qazın enerji keçidini dəstəkləyən rolu vurğulanıb və ölkəmizin həm təbii qaz sektorunun, həm də bərpaolunan enerjinin inkişafına diqqət yönəltdiyi qeyd olunub. Bildirilib ki, hazırda həyata keçirilən “yaşıl enerji” layihələri 2030-cu ilədək elektrik enerjisinin istehsal gücündə bərpaolunan enerjinin payının əhəmiyyətli dərəcədə artmasını təmin edəcək. Azərbaycanın neft-qaz layihələrində əsas tərəfdaşı olan bp şirkəti ilə azad edilmiş ərazilərdə “Şəfəq” günəş elektrik stansiyası layihəsi üzrə əməkdaşlıqdan da bəhs edilib və bu layihənin “Səngəçal” terminalının karbonsuzlaşdırılmasında mühüm rol oynayacağı diqqətə çatdırılıb.

Görüşdə qarşılıqlı maraq doğuran digər məsələlər barədə də müzakirələr aparılıb.