Namiq Əliyev: Tokio Olimpiadasına gələn il azı 8 lisenziya qazanmalıyıq

Olimpiya Oyunlarına vəsiqə qazanmaq artıq çətinləşib. “Tokio-2020”də hər çəki dərəcəsində cəmi 16 idmançı iştirak edəcək. Lisenziyaların sayı təxminən 30 faiz azaldılıb. İlk növbədə, çalışmaq lazımdır ki, lisenziyaları gələn il Qazaxıstanda keçiriləcək dünya çempionatında əldə edək. Qazaxıstanda ən azı səkkiz lisenziya qazanmalıyıq. Digər lisenziya turnirlərinin keçiriləcəyi ölkələrin adları hələ məlum deyil. Biz də bu yarışlardan birini təşkil etmək üçün Azərbaycanın namizədliyini irəli sürmüşük. Sabah Dünya Güləş Birliyinin (UWW) prezidenti Nenad Laloviç Bakıya gələcək. Bu məsələləri onunla da müzakirə edəcəyik.

YeniAvropa xəbər verir  ki,  bunu Azərbaycan Güləş Federasiyasının (AGF) prezidenti vəzifəsini icra edən Namiq Əliyev noyabrın 12-də Olimpiya Güləş Mərkəzində milli komandamızın üzvləri ilə görüşündə deyib.

Tədbirdə məşqçilər və federasiya rəsmiləri ilə görüşən N.Əliyev ötən ay Budapeştdə keçirilən dünya çempionatında medal qazanmış idmançılara mükafatlar təqdim edib.

Azərbaycan güləşçilərinin dünya çempionatında beş medal qazandıqlarını bildirən N.Əliyev vurğulayıb ki, ən yüksək nəticəni Eldəniz Əzizli göstərib: “O, bu il Avropa çempionu oldu. Finalda ağır mübarizə şəraitində dağıstanlı rəqibinə qalib gəldi. Eldəniz 2010-cu ildə Budapeştdə gənclər arasında dünya çempionu adını qazanmışdı. Eldənizi bu uğur münasibətilə təbrik edirik. Onun qızıl medalı bizim üçün təsəlli oldu”.

Komandada hər çəki dərəcəsində mübarizə aparacaq idmançıların dəqiq müəyyənləşdirilməsinin vacibliyini diqqətə çatdıran federasiya rəsmisi bildirib: “Çəki məsələsinə xüsusi diqqət yetirmək lazımdır. Kim hansı çəki dərəcəsində daha güclüdürsə, həmin kateqoriyada da o idmançı çıxış edəcək. Hər çəki dərəcəsində iki kiloqram güzəşt də olmayacaq. Bunun üçün mütəxəssislər dəvət edəcəyik. Güləşdə rəqabət xeyli güclənib”.

Astanadakı mundialın mühüm yarış olduğunu diqqətə çatdıran N.Əliyev vurğulayıb ki, idmançılarımız dünya çempionatında uğurla çıxış etməlidirlər. Bu yarışa çox az vaxt qalıb. Bütün güləşçilərə normal şərait yaradılıb. Səhvlərin üzərində çox çalışmalıyıq. Bir idmançı eyni rəqibə bir neçə dəfə uduzursa, buna aydınlıq gətirmək lazımdır. Abdulrəşid Sadullayev ötən il dünya çempionatının finalında Kayl Snayderə uduzmuşdu. Amma bu dəfə çox qısa vaxtda rəqibinə qalib gəldi. Bu, göstərir ki, o, görüşə ciddi hazırlaşıb. Bu əzmkarlıq bütün güləşçilərimizdə olmalıdır. Hamınızdan qələbə gözləyirik.

AGF rəhbəri Buxarestdə start götürən 23 yaşadək güləşçilər arasında dünya çempionatında çıxış edən idmançılarımıza da uğurlar arzulayıb.