Beynəlxalq Futbol Federasiyaları Assosiasiyası (FIFA) Şurası Rusiyada keçirilən 2018-ci il dünya çempionatını tarixdə ən yaxşı turnir adlandırıb.
YeniAvropa xəbər verir ki, bu haqda FIFA Şurasının üzvü Aleksey Sorokin təşkilatın rəhbər heyətinin oktyabrın 26-da Ruandada keçirilən iclası başa çatdıqdan sonra "TASS" informasiya agentliyinə müsahibəsində bildirib.
“Olduqca ətraflı hesabat səslənib. FIFA-nın yarışların və tədbirlərin keçirilməsi üzrə departament direktoru Kolin Smit faktoloji hesabat təqdim edib. Mən də ümumi və emosional xarakterli çıxış etdim. Ümumilikdə, dünya çempionatı yekdilliklə və bütün parametrlərə görə uğurlu, idman tarixində ən yaxşı turnir hesab edilib. Bu barədə Şuranın qəbul etdiyi hesabatda deyilir”,-deyə A.Sorokin bildirib.
“Bir çox göstəricilərə görə bundan əvvəlki dünya çempionatlarının rekordları təzələnib. Pulsuz nəqliyyat, azarkeşlərin identifikasiyası və digər yeniliklər kimi təşəbbüslərimiz uğurlu sayılıb”, - deyə A.Sorokin sözlərinə əlavə edib.
Xatırladaq ki, dünya çempionatının qalibi finalda Xorvatiya yığmasına 4:2 hesabı ilə qalib gələn Fransa komandası olub. Rusiya yığması öz tarixində ilk dəfə turnirin dörddəbir finalına yüksələrək, penalti seriyasında xorvatlara məğlub olub.
3129
3129
