Dünyanın ən yaşlı kişisi 111 yaşlı britaniyalıdır

İngiltərənin Mersisayd qraflığından Con Tinnisvud dünyanın yaşayan ən yaşlı kişisidir. 

YeniAvropa xəbər verir ki, bu barədə "BBC" telekanalı məlumat yayıb. 

Kötücələri olan bu kişinin aprelin 5-də 111 yaş və 223 günü tamam olub. O, uzunömürlüyük sirrini ənənəvi Britaniya yeməyi – kartofla qızardılmış balıq və gənclik illərində müntəzəm piyada gəzinti ilə izah edib. Tinnisvud indi Sautport şəhərindəki Ahıllar evində qalır. O, yaxınlarına “beyin məşqi” etməyi və bütün məsələlərdə mülayim olmağı məsləhət görür.

Dünyanın ən yaşlı adamı titulunun əvvəlki sahibi, venesuelalı Xuan Visente Peres Mora çərşənbə axşamı 114 yaşında vəfat edib.

“Liverpool” futbol klubunun azarkeşi olan Tinnisvud 26 avqust 1912-ci ildə Sautportda anadan olub. Həyat yoldaşı Blodven ilə İkinci Dünya müharibəsi zamanı tanış olub və onlar 1942-ci ildə evləniblər. Cütlüyün qızı Syuzan 1943-cü ildə anadan olub. Con və Blodven 1986-cı ildə qadının ölümünə qədər 44 il evli olublar.

Tinnisvud 1972-ci ildə təqaüdə çıxana qədər böyük şirkətlərdə - “Royal Mail”, “Shell” və BP-də çalışıb.

Con deyir ki, onun xüsusi pəhrizi yoxdur və Tinnisvud ən çox sevdiyi yeməkdən (balıq və çips) həzz almağa davam edir. O, uzunömürlülük resepti olaraq sağlamlığı qorumağı, həmçinin insanlarla ünsiyyət qurmağı, habelə “orqanizmi heç vaxt çox gücə salmamağı” tövsiyə edir.

Tinnisvud deyir: “İnsanlar çox fərqlidir. Bu fərqdən özümüz üçün istifadə etməliyik. Əks halda, uğursuz olacağıq”.

Con Tinnisvuda aprelin 4-də Ginnesin Rekordlar Kitabının sertifikatı təqdim olunub. Onun yaşayan ən yaşlı kişi olduğuna dair sənədlər Ginnesin Rekordlar Kitabının baş gerontologiya məsləhətçisi Robert Yanq və Gerontologiya Araşdırma Qrupunun üzvləri tərəfindən təqdim edilib.

Dünyanın ən yaşlı qadını isə bu yaxınlarda 117 yaşını qeyd edən ispaniyalı Mariya Branyas Morera hesab olunur.