Səudiyyə Ərəbistanı Azərbaycanla əlaqələrə xüsusi önəm verir

Azərbaycan ilə Səudiyyə Ərəbistanı Krallığı arasında səhiyyə sahəsində əməkdaşlıq genişlənib.

Səhiyyə Nazirliyinin mətbuat xidmətindənYeniAvropa-ya verilən məlumata görə, bunu səhiyyə naziri Teymur Musayev Səudiyyə Ərəbistanı Krallığının ölkəmizə yeni təyin olunan fövqəladə və səlahiyyətli səfiri İssam bin Saleh əl-Cuteyli ilə görüş zamanı deyib.

Nazirlikdə keçirilən görüş tanışlıq və gələcək əməkdaşlığı müzakirə etmək, ümumi maraq doğuran mövzular ətrafında fikir mübadiləsi aparmaq məqsədini daşıyıb.

T.Musayev yeni təyinatı münasibətilə səfiri təbrik edərək Azərbaycan-Səudiyyə Ərəbistanı Krallığı tərəfdaşlığının inkişafı istiqamətində fəaliyyətində uğurlar arzulayıb.

Azərbaycan və Səudiyyə Ərəbistanı Krallığının ortaq mədəni və dini köklərlə bağlı olduqlarını diqqətə çatdıran nazir digər istiqamətlərdə olduğu kimi səhiyyə sahəsində də əməkdaşlığın genişləndiyini bildirib. Teymur Musayev ikitərəfli əlaqələrin möhkəmlənməsində yüksək səviyyəli səfərlərin məxsusi rolunu vurğulayıb. Ölkələrimiz arasında səhiyyə və tibb elmi sahəsində əlaqələrin mövcud vəziyyətindən məmnunluğunu bildirən səhiyyə naziri əməkdaşlığın daha da inkişaf etdirilməsinin vacibliyini vurğulayıb.

Öz növbəsində səfir İssam bin Saleh əl-Cuteyli ölkəsinin Azərbaycanla əlaqələrin inkişafına xüsusi önəm verdiyini bildirib. Onun sözlərinə görə, həmin münasibətlər yaxın dostluq və sıx əməkdaşlıq üzərində qurulub. Səfir qeyd edib ki, dost ölkələr arasında səhiyyə sahəsində qarşılıqlı münasibətlərin səmərəliliyini artırmaq üçün bütün zəruri imkanlar mövcuddur.

Konstruktiv və qarşılıqlı anlaşma şəraitində keçən söhbət zamanı səhiyyə və tibb elmi sahəsində iki ölkə arasında münasibətlərin mövcud vəziyyəti və potensial inkişaf imkanları, həmçinin dərman və digər əczaçılıq məhsulları sahəsində ikitərəfli əməkdaşlığın perspektivləri müzakirə olunub.