Azərbaycan Ağır Atletika Federasiyası ilin ən yaxşılarını mükafatlandırıb

Azərbaycan Ağır Atletika Federasiyasında (AAAF) 2017-ci ilin idman yekunları müzakirə edilib, ilin ən yaxşıları mükafatlandırılıb.

Federasiyadan YeniAvropa-ya  bildirilib ki, mərasimdə AAAF-ın vitse-prezidentləri Tofiq Heydərov, Ruslan Xanverdiyev, baş katib Rizvan Rəsulov, federasiyanın Rəyasət Heyətinin üzvləri, həmçinin il ərzində fərqlənmiş idmançılar, onların məşqçiləri və mütəxəssislər iştirak ediblər.

AAAF-ın vitse-prezidenti Tofiq Heydərov 2017-ci ilin Azərbaycanın idman həyatında uğurlu olduğunu vurğulayıb. Bildirib ki, ağır atletlərimiz də il ərzində mühüm nailiyyətlər qazanıblar. O, IV İslam Həmrəyliyi Oyunlarında komandamızın üzvlərinin bir qızıl və üç bürünc medal qazanmalarını, Tailandda yeniyetmələr arasında dünya birinciliyində yığmamızın doqquzuncu pillədə qərarlaşmaqla gələn il Argentinada keçiriləcək Yeniyetmələrin Olimpiya Oyunlarına lisenziya qazanmasını, həmçinin sentyabrda Kosovonun paytaxtı Priştinada keçirilən Avropa birinciliyində yığmamızın medal sayına görə birinci pillədə qərarlaşmasını böyük uğur kimi qiymətləndirib.

Qeyd edilib ki, 2017-ci ildə ağır atletikanın maddi-texniki bazasının gücləndirilməsi istiqamətində bir sıra addımlar atılıb, yeni zallar istifadəyə verilib, mövcud bazalarda əsaslı təmir-bərpa işləri aparılıb. Həmçinin AAAF yerli yarışların təşkilini daha yüksək səviyyədə təmin edib.

Uğurlu antidopinq siyasətinin tətbiqi nəticəsində bu mübarizədə böyük nailiyyətlərin əldə edilməsi ilə ağır atletikanın əsas problemlərindən birinin həlli istiqamətində ciddi addımların atıldığını bildirən vitse-prezident bu baxımdan Azərbaycan Milli AntiDopinq Agentliyinin fəaliyyətinin təqdirəlayiq olduğunu bildirib.

Sonra 2017-ci ildə uğurlu fəaliyyətlərinə və əldə etdikləri nailiyyətlərə görə ilin ən yaxşı idmançı, məşqçi və hakimləri təltif olunublar.

AAAF rəhbərliyinin seçiminə əsasən, ilin ən yaxşı idmançıları nominasiyasında Səbinə Əzimova, Rövşən Fətullayev, Elnarə Abbasova, Hüseyn İsmayılov, Rüstəm Qasımov, Tarmenxan Babayev, Rəhman Kazımov, Elşən Məmmədov, Məhəmməd Məmmədli, Kənan Xəlilov seçiliblər. İlin kəşfi idmançı Selcan Qarayeva ən yaxşı məşqçisi isə Asif Məmmədov, Taleh Hüseynov, Şəfi Hüseynov mükafatlandırılıblar.

İlin hakimi adına Azad Mustafayev layiq görülüb.

Həmçinin idmançılardan Tarmenxan Babayev, Rəhman Kazımov, Elşən Məmmədov, Elnarə Abbasova, məşqçilərdən Şəfi Hüseynov, Turan Abdullayev və Toğrul Məmmədliyə mənzillərin sertifikatları təqdim edilib.