“DÇ 2018”: Fransa ikinci dəfə dünya çempionu oldu

İyulun 15-də Rusiyada keçirilən futbol üzrə XXI dünya çempionatının finalında Fransa və Xorvatiya milliləri qarşılaşırlar. YeniAvropa xəbər verir  ki, Moskvadakı “Lujniki” stadionunda oynanılan görüşdə fransızlar ikiqat dünya çempionu olmaq, xorvatiyalılar isə kuboku ilk dəfə başları üzərinə qaldırmaq üçün mübarizə aparırlar.

Oyunu argentinalı referi Nestor Pitana idarə edir.

Matçın 19-cu dəqiqəsində Fransa millisi görüşdə hesab açıb. Oyunun 19-cu dəqiqəsində Antuan Qrizmanın yerinə yetirdiyi cərimə zərbəsindən hava ötürməsindən sonra Rafael Varanın başla qapıya göndərdiyi top Mario Mandzukiçə toxunduqdan sonra qapıya daxil olub – 1:0.

Görüşün 27-ci dəqiqəsində xorvatiyalıların sürətli əks-hücumu zamanı İvan Perişiçə qarşı kobudluq edən Nqolo Kante sarı vərəqə ilə cəzalandırılıb.Xorvatiyalıların yerinə yetirdiyi cərimə zərbəsi ilə başlayan hücumda cərimə meydançasına ötürülən topu Domaqoy Vida İvan Perişiçə göndərib. Topu qüvvətli zərbə ilə qapıya göndərən İvan Perişiç matçda hesabı bərabərləşdirib – 1:1.

Matçın 34-cü dəqiqəsində Fransa yığmasının yerinə yetirdiyi küncdən zərbə ilə cərimə meydançasına ötürmə zamanı topun İvan Perşiçin əlinə dəyməsi ilə əlaqədar yaranan mübahisləi vəziyyət VAR sistemi ilə yenidən dəyərləndirilib.Argentinalı referi Nestor Pitananın matçın 38-ci dəqiqəsində Xorvatiya yığmasının qapısına təyin etdiyi 11 metrlik cərimə zərbəsini dəqiq yerinə yetirən Antuan Qrizman Fransanı yenidən hesabda irəli çıxarıb – 2:1.

Matçın 59-cu dəqiqəsində Fransa seçməsi hesab arasındakı fərqi iki topa çatdırıb. Sürətli əks-hücum zamanı Mbappenin ötürməsindən sonra rəqibin cərimə meydançasında topu qəbul edən Antuan Qrizman onu ram edərək Pol Poqbaya ötürüb. İlk zərbəsi müdafiəçi Lovrendən geri qayıdan Pol Poqba ikinci cəhdində topu qapıya göndərməyi bacarıb – 3:1.

Matçın 65-ci dəqiqəsində Kaylian Mbappe Fransa millisinin dördüncü qolunu Xorvatiya yığmasının qapısından keçirib. Luka Hernandesdən ötürmə alan Kaylian Mbappenin qüvvətli zərbəsi qapıçı Daniel Subaşiç üçün əlçatmaz olub – 4:1.

Bu qol Kaylian Mbappe üçün xüsusilə əlamətdar olub. Belə ki, o, braziliyalı Peledən sonra final qarşılaşmasında 20 yaşına çatmamış fərqlənən ikinci futbolçu kimi tarixə düşüb.

Lakin Xorvatiya yığmasının bu qola cavabı çox gecikməyib. Oyunun 69-cu dəqiqəsində qapıçı Uqo Lorisə pressinq tətbiq edən Mario Mandzukiç qolkiperin səhvindən istifadə edərək hesab arasındakı fərqi azaldıb – 4:2.

Oyunun qalan dəqiqələrində əlavə qol olmayıb və matç Fransa yığmasının qələbəsi ilə başa çatıb.

Beləliklə, futbol üzrə XXI dünya çempionatın finalında Xorvatiya yığmasına 4:2 hesabı ilə qalib gələn Fransa seçməsi tarixində ikinci dəfə dünya çempionu adını qazanıb.

Fransızlar son 20 ildə oynadığı üçüncü final qarşılaşmasının ikisində qalib gəlməyi bacarıblar.

Fransa yığmasının baş məşqçisi Didye Deşam 1998-ci ildə kapitan kimi qazandığı dünya çempionluğunu bu dəfə baş məşqçi kimi əldə edib.

Xatırladaq ki, XXI dünya çempionatında üçüncü yer uğrunda görüşdə Belçika millisi İngiltərə seçməsini 2:0 hesabı ilə məğlub edərək bürünc medallara sahib olub. Çempionatın ən məhsuldar komandası və futbolçusu adları məhz bu iki komandaya məxsusdur. Belə ki, Belçika millisi ən çox qol vuran (16) komanda, ingilislərin hücumçusu Harri Keyn isə ən çox fərqlənən (6 qol) futbolçudur.