Azərbaycan Həndbol Federasiyasının(AHF) prezidenti, Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov iyunun 19-20-də Şotlandiyanın paytaxtı Qlazqoda keçiriləcək Avropa Həndbol Federasiyasının (EHF) illik konqresində iştirak edəcək.
YeniAvropa xəbər verir ki, bu haqda AHF-dən bildirilib. Qeyd edilib ki, texniki komissiyanın iyunun 18-nə təyin olunan iclası da daxil olmaqla konqresin proqramı və səsverməyə çıxarılacaq mövzular artıq təsdiqlənib.
Konqresdə EHF-in prezidentinin, baş katibinin, texniki, yarış, metodiki, çimərlik həndbolu komissiyalarının və qanuni nümayəndənin hesabatları dinləniləcək. Həmçinin 2016-2018-ci illərə dair maliyyə hesabatları təqdim olunacaq, bu il üçün büdcə təsdiqlənəcək.
Konqresdə federasiyanın sabiq prezidenti Jan Brihaultın başçılıq etdiyi işçi qrupunun 2020-ci ildən sonra EHF-də struktur dəyişikliyi ilə əlaqədar tövsiyələri nəzərə alınıb. Bununla yanaşı, milli federasiyalar tərəfindən də təkliflər irəli sürülüb. Norveç konqreslərə müstəqil müşahidəçi dəvət edilməsini, Slovakiya nümayəndələrin təyin olunmasında peşəkarlıq məsələsinin nəzarətdə saxlanılmasını, İsveçə həndbolçuların idman geyimlərinin üzərindəki reklamların əks olunmasını təklif edib.
EHF-in konqresində müzakirəyə çıxarılacaq digər məsələlər arasında 2019–cu ildəki dünya çempionatının Avropa təsnifat turnirinin püşkünün atılması, Avropa Həndbol Federasiyasinin 15-ci illik konqresinin, 2022-ci və 2024-cü illərdə keçiriləcək kişilər və qadınlar arasında Avropa çempionatlarının təşkil olunacağı yerlərin seçilməsi və s. də var.
Qeyd edək ki, ölkəmizi konqresdə AHF-nin prezidenti Saleh Məmmədovla yanaşı federasiyanın vitse-prezident Orxan Abbasov də təmsil edəcək.
3094
3094
