AZAL koronavirusa görə obyektlərini dezinfeksiya edir

“Azərbaycan Hava Yolları” QSC (AZAL) koronavirus infeksiyasının yayılmasının qarşısını almaq üçün bütün mülki aviasiya obyektlərinin dezinfeksiyasını həyata keçirir.

QSC-nin mətbuat xidmətindən YeniAvropa-ya bildirilib ki, AZAL və “Buta Airways” aviaşirkətləri tərəfindən bu istiqamətdə bir sıra tədbirlər görülür. Belə ki, uçuşlardan sonra hava gəmilərinin xüsusi dezinfeksiyaedici mayelərlə dezinfeksiyası həyata keçirilir. AZAL və “Buta Airways” aviaşirkətlərinin bütün təyyarələri universal profilaktik dəstlər, qoruyucu maskalar və dezinfeksiyaedici vasitələrlə təchiz edilib, hava gəmilərində HEPA havalandırma filtrləri vaxtaşırı dəyişdirilir, təyyarədə koronavirus infeksiyasına yoluxmaqda şübhəli bilinən xəstə aşkarlandığı zaman tədbirlərin görülməsi üçün uçuş heyəti ilə treninqlər aparılıb.

Azərbaycanın beynəlxalq hava limanlarında da bir sıra tədbirlər həyata keçirilir. Sutka ərzində dörd dəfə qeydiyyat zonalarında, tualetlərdə, sərnişinlər üçün nəzərdə tutulmuş otaqlarda bütün səthlərin, habelə sərnişinlərə və onların baqajlarına xidmət göstərən işçi heyətinin geyim və ayaqqabılarının dezinfeksiyası təmin edilir. Gələn bütün sərnişinlər bədən hərarətini ölçən xüsusi cihaz vasitəsilə 3 səviyyəli yoxlamadan keçir. Koronavirus infeksiyasına yoluxması şübhəli bilinən sərnişinin olduğu hava gəmisi üçün karantin meydançası ayrılıb. Belə hava gəmisinə xidmət göstərmək üçün istifadə olunmuş xüsusi texnika dezinfeksiyaedici vasitələrlə xüsusi qaydada emaletmə prosedurundan keçir. Yüksək bədən hərarəti aşkar olunan şəxslərin dərhal təcrid edilməsi üçün aeroportda xüsusi otaq ayrılıb, koronavirus infeksiyasına yoluxmaqda şübhəli bilinən şəxslərin ixtisaslaşdırılmış tibb müəssisəsinə çatdırılması üçün hava limanı ərazisində təcili tibbi yardım maşınları daim növbətçilik edir.

Həmçinin hava gəmilərinə bort qidasının təchizatı və təyyarələrin təmizlənməsi ilə məşğul olan “Sky Catering” şirkəti tərəfindən də tədbirlər görülür. Bort qidasının hazırlandığı sexlərdə təkrar istifadə olunan qab-qacağın əlavə dezinfeksiyası təmin edilir, bort qidasının daşınmasında istifadə olunan çıxarıla bilən avadanlıqların və texnikanın dezinfeksiyası təmin olunur, koronavirus infeksiyasına yoluxmasına şübhəli bilinən xəstə aşkar edildiyi zaman həmin hava gəmisindəki qablar və yemək ləvazimatları ilə qida konteynerləri dezinfeksiyaedici vasitələrlə xüsusi qaydada emal edilir, işçilər ilə koronavirus infeksiyasının yayılmasının qarşısının alınması üçün treninqlər keçirilir.

Sərnişinlər tərəfindən Azərbaycanda əlaqə məlumatları və hava gəmisində oturacaq yerinin nömrəsi qeyd edilməklə, sağlamlıq vəziyyəti haqqında xüsusi anketin doldurulması və Heydər Əliyev Beynəlxalq Aeroportuna gəldikdə hava gəmisinin ekipajı tərəfindən Dövlət Gömrük Komitəsinin əməkdaşlarına mütləq qaydada təqdim edilməsi aeroportda fəaliyyət göstərən bütün aviaşirkətlərin nəzərinə çatdırılıb və tapşırılıb.

Hava gəmisində koronavirus infeksiyasına yoluxmaqda şübhəli bilinən xəstə aşkarlandığı zaman qida konteynerləri qablar və süfrə ləvazimatları ilə birlikdə dezinfeksiyaedici vasitələrlə xüsusi qaydada emal edilir.

Sadalanan tədbirlər vəziyyəti nəzarətdə saxlamağa və koronavirus infeksiyasının ölkənin hava nəqliyyatı vasitəsilə yayılması ehtimalını minimallaşdırmağa imkan verir.

Həmçinin Heydər Əliyev Beynəlxalq Aeroportunda operativ qərargah yaradılıb və reyslərin uçuş cədvəlindəki dəyişikliklər və digər aviasiya prosedurları ilə bağlı bütün məsələlərlə əlaqədar müraciət edə biləcəyiniz, 24 saat fəaliyyət göstərən “qaynar xətt” fəaliyyət göstərir: (+994 12) 497 85 89.